Itillimi tingulluttut amerlaqaat
Itillimi tingullunneq qangali naluneqanngilaq, tassa 1980-ikkunni -90-ikkunnilu amerlasuunik tingulluttoqarnera naluneqanngimmat, 2007-imilu Itillermiut misissoqqissaarneqarput. Itillermiut tingulluutinik hepatitis B-mik D-millu nappaateqarput, taakkualu ataatsikkut nappaatigigaanni assut perulutsitsisartut, Ove Rosing Olsen allappoq. Hepatitis B kisiat nappaatigigaanni ilaannikkut malunnarneq ajorpoq. Itillimi tunillatsinnikuunngitsut akiuussutissamik kapitinnissaminnik neqeroorfigineqarput, tunillatsinnikullu aaversipput tingulluutaallu sakkortusiartulissagaluarpat katsorsarneqarnissaminnik neqeroorfigineqassallutik. Akiuussutissamik kapuuinikkut hepatitis B-mik nappaateqarnerup nungutinneqarsinnaanissaa Ove Rosing Olsenip allakkamini neriuutiginerarpaa.