Meeqqat qimaasut Italiami niunissaat akuerineqartoq
Italiap nunamut namminermut ministeria Matteo Salvini umiarsuup meeqqanik qimaasunik 27-nik ilaasullip tulannissaanut pinaakkaluarluni akuersivoq.
Umiarsuaq Italiap qeqertaata Lampedusap avataani ullut arlallit kisarsimavoq.
"Ukiukitsuunerarneqartut" umiarsuarmit spaniamit ikiuiniaqatigiiffimmit Proactiva Open Armsimit pigineqartumit niunissaat akueriniarlugu ministeriunermut Giuseppe Contimut allappoq.
- Naak politikkinnut akerliugaluartoq, ilanngullugu allappoq.
Inuit 107-it umiarsuarmiiginnassasut
Inersimasulli 105-it meeqqallu ilagineqartut marluk umiarsuarmit niussanngillat. Umiarsuarmi pissutsit ilungersunarluinnartut Open Armsimit oqaatigineqarpoq.
Italiap sinerissami alapernaarsuisuisa meeqqat sapaatit akunneri marluk umiarsuarmeereersut Lampedusamut niusikkiartoreeraat meeqqat ilagineqanngitsut niusut, Open Arms Twitterikkut allappoq.
AAMMA ATUARUK Suliniaqatigiiffik Læger Uden Grænser immamut akullersuarmukartitsipput
Salvini qimaasunut, Afrikap avannaaninngaanniit Italiamukarniarsarisunut sukangasutut tusaamanerlunneqarpoq. Ikiueqqaarniat umiarsuaasa Italia aqqusaarnissaat itigartittareerpai.
Italiap naalakkersuisuisa Salvinip partiianit talerperliusumit Legamit Movimento 5 Stellemiillu ilaasortaarfigineqartut akornanni avissaartuuttoqarpoq.
Salvini qinersisoqaqqinnissaanik kissaateqartoq tamatumunnga pisooqataavoq. Qinersisitsisoqassappallu taassuma partiia ajugaasuussasoq inuit isumaannik paasiniaanerit takutippaat.
/ritzau/AFP
