Isumasiuineq: Innuttaasut 3/4-iisa urani pillugu taasitinneqarnissartik kissaatigaat

Aperineqartut 71 procentiisa urani pillugu innuttaasut taasitinneqarnissaat "isumaqataaffigaat imaluunniit "ilaatigut isumaqataaffigalugu".
Urani? Naamik Assi © : Dennis Rosing Ingemann/KNR
Allattoq Karsten Sommer
novembarip 21-at 2014 12:13

Partiit qanoq inissisimanerannik HS-Analysep misissuinerata Sermitsiami ullumi saqqummiunneqartup saniatigut, isumasiuisarfiup qinersisartut qineqqusaarnermi sammineqartut ilaat pillugit qanoq isumaqarnersut inuit 759-it novembarip qaammataata ingerlanerani apersorsimavai.
 
Innuttaasut taasitinneqarnissaat partiini tamani amerlanerussuteqartut isumaqataaffigaat. Tupaallannanngitsumillu IA-mi amerlanersaapput, taakkunannga 76 procentit taasititsisoqarnissaa tapersermassuk. Siumullu qinersisartuisa 53 procentiisa urani pillugu taasititsisoqarnissaa aamma tapersersorpaat.

 

Qaqortumili mittarfiliortoqarnissaa tapersersorneqarpallaanngilaq
Apersorneqartummi 40 procentiinnaasa pilersaarutit taakku "isumaqataaffigaat" imaluunniit "isumaqataaffigisinnaallugit".
 
Mittarfiliornissamik pilersaarutinut tunngatillugu Siumumi amerlanerussuteqalaartut - 51 procentit - tapersiipput, partiillu sinnerini pingajorarterutaasut missaasa pilersaarutit taperserlugit - Qaqortumilu mittarfiliornissaq Demokraatini orniginartinneqannginnerpaavoq, taakkunani suliniut sisamararterutaannarnit taperserneqarmat.
 
Kommunit aggulunneqarneri, namminersorlutik oqartussat suliffeqarfiutaannik namminersortunngorsaanissaq akileraarutitigullu nalimmassaaneq HS-Analysep aamma apeqqutigisimavai.


IA-p Siumullu naalakkersuisooqatigiinnissaannut tapersiisut

Kiisalu, Siumup IA-llu atituumik naalakkersuisooqatigiilersinnaanerannut inuit qanoq isumaqarnersut aamma apeqqutigisimavaa.
 
Taakkunanngalu 68 procentit taamatut pisoqarsinnaanera "isumaqataaffigaat" imaluunniit "isumaqataaffigisinnaallugu". Siumumi amerlanersaapput, 72 procentit atituumik naalakkersuisooqatigiittoqarnissaa neriuutigineqarmat, affaasalu missaat - 53 procentit - IA-mik qinersisartunit isumaqataaffigineqarluni.
 
Isumasiunermi angusat tamaasa Sermitsiami ullumi saqqummersumi atuarneqarsinnaapput, aviisilu piniarfinni tamani akeqanngitsumik pissarsiarineqarsinnaavoq.