Immikkut ilisimasalik: Isumaqatigiissut pitsaanerpaavoq
Naaperiutigineqartoq pitsaalluinnarpoq.
Kalaallit Airports A/S. pillugu piginneqatigiinnissamik isumaqatigiissut pillugu piginneqatigiiffiit pillugit inatsisiliorneq pillugu Copenhagen Business Schoolimi lektori, Troels Michael Lilja taama naliliivoq.
- Piginneqatigiinnissamik isumaqatigiissut tamanut pitsaasuusoq isumaqarpunga. Isumaqatigiinninniarnermi Kalaallit Nunaat Danmarkilu assigiinngitsunik soqutigisaqaraluarlutik isumaqatigiissusiorluarsimapput.
* Naalagaaffik Nuummi Ilulissanilu mittarfinnut 700 mio. koruuninik aningaasaliivoq. Naalagaaffiup taamaalilluni mittarfiit marluk 33,3 procentimik piginneqataaffigisinnaalerpai
* Den Nordiske Investeringsbankimit 450 mio. koruuninik atorniartoqarpoq, naalagaaffillu atornermut qularnaveeqqusiisuuvoq, taamaalilluni atukkanit erniat appasissinnaallutik.
* Naalagaaffik aningaasaliissutinik pisariaqartitat sinnerinut 450 millionit koruuninik erniakitsumik taarsigassarsisitsissaaq.
* Naalakkersuisut Naalagaaffillu 220 mio. koruuninik sanitigut aningaasaliipput, taakku Nunatsinni inuussutissarsiornerup ineriartortinneranut atorneqassapput.
AAMMA ATUARUK Kalaallit Airports pillugu piginneqatigiinnissamik isumaqatigiissut saqqummiunneqartoq
- Kalaallit Nunaat Danmarkilu isumaqatigiinnissaq tungaanut isumaqatiginninniarluarsimasut takussutissaqarluarpoq. Politikkikkut isumaqatiginninniarnerat silatusaarlutik ingerlassimagaat malunnarmat. Siunissarmi eqqarsaatigalugu isumaqatigiissummi sinaakkutissat allanngujaatsuusariaqarnerat pingaaruteqartoq, Troels Michael Lilja isumaqarpoq.
Malittarisassat allanngujaannissaat pingaartoq
Naalagaaffik Nuummi Ilulissanilu mittarfinnut 700 millionit koruuninik aningaasaliivoq. Naalagaaffiup taamaalilluni mittarfiit marluk 33,3 procentimik piginneqataaffigisinnaalerpai.
Piginneqatigiinnissamik isumaqatigiissummi immikkoortut pingaarnerit ilagaat ingerlatseqatigiiffiup siulersuisui ataatsimeersuarnermi qinikkat tallimat arfineq-marlullu akornanni amerlassuseqassasut, Kalaallit Airports Holding A/S-ilu Namminersorlutik Oqartussanit tamakkiisumik pigineqartoq siulersuisuni ilaasortassanik sisamanik inassuteqassasoq, tassunga ilaallutik siulersuisuni siulittaasoq, danskillu naalagaaffiat siulersuisuni ilaasortassanik marlunnik inassuteqassasoq.
Aamma danskit naalagaaffiat arlalitsigut itigartitsisinnaatitaanissaa isumaqatigiissutigineqarpoq, soorlu kina siulersuisuni siulitaasussanersoq ingerlatseqatigiiffimmilu pingaarutilinnik allannguisoqassatillugu, tamannali nalinginnaalluinnartoq, Troels Lilja nassuiaavoq:
- Aningaasaliineq taama annertutigisoq pineqartillugu sunarpiaq anguniarneqarnersoq eqqumaffigineqartariaqarmat. Soorlu isumaqatigiissut allanngortiinnarneqarsinnaassaanngimmat imaluunniit piginnittut taarserneqariaannariaanatik.
AAMMA ATUARUK Pakatsinartorujussuuvoq
Taanna nassuiaavoq piginneqatigiinissamik isumaqatigiissut piginneqatigiiffiup malittarisassaanut tapertaasoq, illuatungeriinnut isumannaallisaataasumik, taamaalilluni arlaannaalluunniit illuinnaasiorluni iliorsinnaaqqunagu.
Isumaqatigiissutilli imaata malittarisassani tuaviornerpaamik allassimasunngortinnissaat, immikkut ilisimasallip inassutigaa. Taamaaliunngikkaanni Danmarkip piginneqataassutini malittarisassanik unioqqutitsinani tunisinnaavai.
- Taamannallu tunisinermi Kalaallit Nunaat aningaasanik annaasaqanngikkuni iliuuseqarsinnaanngilaq.
