Isumapiloqarluni tatiginnilersitsiniaaneq inerteqqutinngussasoq: Politiit atornerluisoqartinnagu iliuuseqarsinnaalissapput

- Isumapiloqarluni nittartakkakkut attaveqaatitigut tatiginnilersitsiniaasunut maanna iliuuseqarsinnaanngilagut.

Kalaallit Nunaanni politiit unnerluussisuisa pisortaat, Mariam Khalil, isumapiloqarluni nittartakkakkut attaveqaatitigut tatiginnilersitsiniaasoqartarnera pillugu taama oqarpoq.

Tassa inersimasoq meeqqamut inuusuttumulluunniit nittartakkakkut attaveqaatitigut kimigiiserluni tingaaffiginninniartoq isumapiloqarluni tatiginnilersitsiniaasumik taaneqartarpoq.

Tassa inersimasup inuusuttoq 15-ileereersimasoq, 18-iliisimanngitsorli, taamaaliorpagu, isumapiloqarluni kannguttaalliorsimasutut unnerluutigineqarsinnaavoq.

Inersimasulli meeqqamut inuusuttumulluunniit nittartakkakkut attaveqaatitigut allaqatigiinnikkut isumapiloqarluni tatiginnilersitsiniaanerata malitsigisaanik kannguttaalliortinnagu siusissukkut iliuuseqarsinnaanissaq pisariaqarpoq.

Tassalu pinerluttulerinermi inatsit allanngorpat, inersimasoq meeqqamut inuusuttumulluunniit nittartakkakkut attaveqaatitigut isumapiloqarluni tatiginnilersitsiniaariarlunilu naapitsinnginnerani taamaaliorsimasutut unnerluutigineqarsinnaalissaaq.

- Isumapiloqarluni meqqamut inuusuttumulluunnniit nittartakkakkut attaveqaatitigut attaviginninniarneq tiinganiarnermik siunertaqartoq takutissinnaallugulu uppernarsarsinnaagutsigu, taamaaliortoq attavigisaminut kinguaassiornermut tunngasumik attaveqarsimanersoq attaveqangajaannarsimanersorluunniit uppernarsarnissaa pisariaqarunnaassaaq, Mariam Khalil KNR-imut oqarpoq.
 
- Taamaalillutami siusissukkut iliuuseqarsinnaalissaagut, taamaaliortullu maannaminngarnit siusinnerusukkut aamma pineqaatissinneqarsinnaalissapput, taanna oqarpoq.

Meeqqat inuusuttulluunniit namminneq pisuunngisaannartut

Nunatsinni meeqqanik inuusuttunillu minnerunngitsumik nittartakkakkut attaveqaatitigut kinguaassiornermut tunngasumik atornerluinerit killilerniarlugit pinerluttulerinermi inatsisip allanngornissaanik siunnersuut inatsissanut ataatsimoortunut arlaliusunut ilaavoq.

Inatsisissat ataatsimoortut taakkua Inatsisartut ukiaq ataatsimiikkamik akueraat, taakkualu Folketingimi suliarineqaleruttorput.

Suliniaqatigiiffippaat isumapiloqarluni nittartakkakkut attaveqaatitigut tatiginnilersitsiniaaneq pillugu malittarisassat sukannernerulernissaannut tapersersuipput. Inuit Pisinnaatitaaffii pillugit Siunnersuisoqatigiit taakkununnga ilaapput, groomingilu qanoq isumaqarneranik meeqqanut inuusuttunullu qaammarsaanerusoqartariaqartoq, taakkua isumaqarput. Taamaaliortoqarpammi, meeqqat inuusuttullu taama nalaatallit inersimasumut tatigisaminnut oqaatiginninnissamik sapiutinnginnissaannut aqqutissiuunneqassasut isumaqarput.

Groomingertumit attavigineqartareerluni atornerlunneqarsimanerminik Lili Frederiksen Chemnitz ukiaq oqaluttuartoq videomik immiunneqarpoq, immiussarlu taanna Inuit Pisinnaatitaaffii pillugit Siunnersuisoqatigiit Instagramianni isiginnaarneqarsinnaavoq.

Lili Frederiksen Chemnitz aqqaneq-aqqaneq-marluk missaanni ukioqarluni angummit 20-it sinnerlugit ukiulimmit neriniartarfimmiitillutik maluginiarinnitsiminit nittartakkakkut attaveqaatitigut attavigineqarami allaqatigiittalerput.

- Isumassorneqarnermik amigaatigisannik tunisarpaanga, Lili Frederiksen Chemnitz videomik immiunneqarami oqarpoq.

Angut taanna ukiualunni allaqatigisareerlugu taamaallutik fiistertuneeqatigiipput, taakkunaneereeramillu angummit tassannga kinguaassiuutitigut atornerlunneqarpoq. Lili Frederiksen Chemnitz taamanikkut 14-inik ukioqarpoq.

- Ullumikkut qularinngilara grooming nalaatarisimallugu, Lili Chemnitz aamma oqarpoq. Misigisaanullu assingusumik nalaataqarsimasut tamaasa inersimasumik tatigisaminnik oqaloqateqarnissaannik aamma kaammatttorpai.

Groomingernerlu inerteqqutinngorpat, meeqqat inuusuttulluunniit groomingimik nalaataqarsimasut akisussaatinneqartannginnissaat pingaarluinnartuusoq, Kalaallit Nunaanni politiit unnerluussisuisa pisortaat Mariam Khalil oqarpoq.

Inersimasulli groomingertup kisiat akisussaatinneqartalernissaa inatsisit allanngorpata qulakkeerneqassaaq.

- Inatsimmik allannguineq ima paasisasssanngortitaavoq: Meeqqat inuusuttullu ussernartunut qanittaraluaqisut taama nalaataqarnertik namminneq pisuussutiginngisaannarpaat, Mariam Khali oqarpoq.

Kimigiiserluni tiinganiarneq inerteqqqutinngussasoq

`Kimigiiserluni tiinganiarneq´ inatsisit allanngorpata aamma inerteqqutinngussaaq. Tassa inersimasoq meeqqamut inuusuttumulluunniit kimigiiserluni tiinganiartoq sextortionertuusarpoq, taamaaliortullu attavigisani soorlu kinguaassiornermut tunngasumik imminut arlaatigut qanoq iliornissaanik kimigiiserfigisarpaa.

Taamaaliortut attavigisatik itigartitsigaangata, soorlu inuttai pillugit paasissutissanik taakkualuunniit assinginik tamataqanngitsunik siammarterinissamik sioorasaarikkajupput.

Kimigiiserluni tiinganiarneq nunarsuaq tamakkerlugu ajornartorsiutaaleraluttuinnarpoq. Tamatumunngali nunarput inatsisitigut aatsaat malinnaanialertoq, Mariam Khalil oqarpoq.

- Meeqqanik kinguaassiuutitigut atornerluineq unioqqutitsinertut isigineqartuaannarnikuuvoq. Meeqqamulli kinguaassiornermut tunngasumik imminut arlaatigut qanoq iliornissaanik kimigiiserneq unioqqutitsinertut isigineqanngisaannarnikuuvoq.

Taamatulli tassa isigineqartalertussanngorpoq. Inersimasummi meeqqamut kinguaassiornermut tunngasumik imminut arlaatigut qanoq iliornissaannik kimigiisertut kinguaassiuutitigut atornerluisimasutut pineqaatissinneqarsinnaalissapput.

Inuit Pisinnaatitaaffii pillugit Siunnersuisoqatigiit, Meeqqat Oqaaseqartartuat Danmarkimilu Red Barnet nunatsinni meeqqanut inuusuttunullu isumapiloqarluni tatiginnilersitsiniarnerit kinguaassiuutitigullu allatut atornerluinerit killilerniarlugit inatsisit allanngornissaannut tapersersuisut ilaminiinnaraat.

Tamakkua pillugit inatsisissatut siunnersuutit akuerineqarpata, 2024-mi juulip aallaqqaataani atuutilissapput.