Naalakkersuisut: Isumannaallisaanerup ileqqugut kalluarnavianngikkai
- Ajoriffissaqartinngilara taamatut sukaterisoqassappat, pissutigalugu isumannaallisaaneq aallaasinillu aallartoortaneq aamma nakkutigineqarnera eqqarsaatigalugu tassani uanga tunginningaaniit tapersersornartippara, Nikkulaat Jerimiassen taama oqarpoq.
AAMMA ATUARUK Sakkut pillugit inatsimmik sukaterinissaq piniartunit ilassilluarneqartoq
Inatsisip sukaterneratigut inuit isumannaannerulernissaat, taassuma erseqqissaatigaa.
- Tassa tassani pineqarpoq ilaatigut inuit inuunerannik akeqartumik, taamatut aallaasinik aallartoortoqartarnera ilaatigut ukiukitsut.
Perngartitsisoqarsinnaavoq
Taassuma ilanngullugu erseqqissaatigaa aallaasit atorneqarsinnaanerannut inatsimmik sukaterinissaq, nunatsinni ileqqutoqqanut soorlu, meeqqat perngartinneqartarneranut tunngatillugu akornutaanavianngitsoq. Tassami meeraq inersimasumik imaluunniit akuersissuteqartumik ilaqarluni perngartinneqarsinaavoq.
- Soorunami angajoqqaat ilagalugit taanna kulturerput attatiinnarneqarnissaa qularutissaanngilluinnarpoq. Aamma qularinngilara illersorneqassasoq. Tassani sualummik piniartussatut piniartullu akornanni peroriartorneq eqqarsaatigalugu, taanna saneqqukkuminaatsupilussuuvoq aallaasip qanoq atorneqarnissaa qanorlu paarineqarnissaa eqqarsaatigalugu, Piniarnermut naalakkersuisoq, Nikkulaat Jerimiassen KNR-imut oqarpoq.
AAMMA ATUARUK Aallaasit toqqortarineqartarnerinut piumasaqaatit sukannernerusut
Inatsisissatut siunnersuut 2019-imi januaarip qulingata tungaanut tusarniutigineqassaq. Siunnersuut kingorna Inatsisartuni Folketingilu oqaluuserineqassaaq.
