Suka: Isumalioqatigiissitap sulinini nangeqqissavaa

Tunngaviusumik inatsisissaq pillugu isumalioqatigiissitami siulittaasoq Vivian Motzfeldt KNR-imut pingasunngormat oqarpoq isumalioqatigiissitami sulineq unitsikkallarneqartoq, tassani Mala Høy Kuko aamma Ane Hansen isumalioqatigiissitami suli ilaasortaaginnarsinnaanersut nalornissutigineqarmat.

Namminiilivinnermulli Naalakkersuisup sulinermik unitsisineq taassuminnga tunngavissaqanngitsoq Qanoruumut sisamanngormat oqarpoq:

- Decembarip arfineq-pingajuanni allakkiorfigivagut kaammattorlugit piaartumik sulinertik ingerlateqqittariaqaraat. Tamatumalu kingornatigut siulittaasoq oqaloqatigivara ilaatigut, aamma kaammattorlugu aallarteqqullugu, Suka K. Frederiksen taama oqarpoq.

AAMMA ATUARUK Tunngaviusumik inatsisissamut isumalioqatigiissitaq quianaannarpoq

Namminiilivinnermut Naalakkersuisoq aamma isumalioqatigiissitami siulittaasup isumaqatigiinnginnerat siullermiilinngilinngilaq. Isumalioqatigiissitarmi aallartimmalli siulittaasoq Vivian Motzfeldt tunngaviusumik inatsisissap marlunngorlugu suliarineqarnissaa itigartitsissutigaa, naak suliassat allattorsimaffianni Naalakkersuisut allataanni allassimagaluartoq.  

AAMMA ATUARUK Tunngaviusumik inatsisissaq pillugu sulineq unitsinneqarallartoq

Sulinermilli unititsigallarneq pillugu Naalakkersuisut tallimanngornermi ataatsimiinnerminni oqaluuserissagaat Suka K. Frederiksen oqarpoq.

Qaammatini marlunni unititsigallarsimaneq siulittaasumut kinguneqartinneqassava?

- Isumaqarpunga maannakkut tunngavissaqanngitsunga allannguutinik oqariartuuteqassallunga. Naalakkersuisut oqaluuserisassaq aqagu (5. januar 2018) oqaluuserissavaat. Tamatumalu kingorna naalakkersuisooqatigiit sinnerlugit oqaaseqartussaassaanga, Suka K. Fredriksen taama oqarpoq.

AAMMA ATUARUK Motzfeldt skal ikke blande sig i kommissionens sammensætning