Qujaukitsup isumalioqatigiissitamit isornartorsiuineq akerlilerpaa
Tunngaviusumik Inatsisissaq pillugu Isumalioqatigiissitamut ilaasortat sulinerminni atukkatik pillugit saaffiginnissutaat Naalakkersuisunit arriippallaartumik akineqarput, isumalioqatigiissitallu suliaata piffissaliussamut naammassinissaa ilimananngilaq. Isumalioqatigiissitap siulittaasuata tullia, Kuupik V. Kleist taama uparuaavoq.
Tassalu Kleist isumalioqatigiissitap siulittaasorisimasaata Doris J. Jensenip siulittaasutut novembarip naanerani tunuarnerminut atatillugu isornartorsiutaanut tapersiivoq.
Aningaasaqarnermut naalakkersuisoq, Vittus Qujaukitsoq Tunngaviusumik Inatsisissaq pillugu Isumalioqatigiissitamut akisussaasuuvoq, allakkatigullu akissuteqarluni KNR-imut ima allappoq:
Qujaukitsoq: Sulinermi atukkat naleqquttuussapput
- Isumalioqatigiissitami sulinermi atukkat soorunami naleqquttuussapput, Qujaukitsoq allappoq. Isumalioqatigiissitamiilli saaffiginnissutinik isumalioqatigiissitamilu sulinermik pingaartitsinerusinnaasutut isornartorsiutit akerlilerpai.
Isumalioqatigiissitami ilaasortat suliassiissutaat aningaasarsiaannut naleqqutinngitsut isumalioqatigiissitap siulittaasoqarfianit Vittus Qujaukitsumik ataatsimeeqateqarnerni oqaatigineqartarsimasoq, Vittus Qujaukitsoq allappoq.
AAMMA ATUARUK Forfatningskommissionen er gået i stå - igen
- Tamatumunnga atatillugu siulittaasoqarfik piffissamik atuineq pillugu Naalakkersuisunut allakkatigut saaffiginninnissamik siunnersorpara. Taama saaffiginnissuteqartoqarmat qisuariarfigaara. Tamanna sulinerup pingaaruteqarneranik tunulliussinertut taaneqarsinnaanngilaq, Vittus Qujaukitsoq allappoq.
Allannguinissaq sulisutigigaat
Naalakkersuisut sulinermi ingerlatseriaatsimut allannguinissaat utaqqineqarmat isumalioqatigiissitaq suliaqarfiuallaanngitsoq Kuupik Kleist aamma oqarpoq.
AAMMA ATUARUK Doris J. Jensen Tunngaviusumik inatsisissaq pillugu isumalioqatigiisitamit tunuartoq
Allannguutissallu sulissutigineqartut Qujaukitsoq oqarpoq.
- Naalakkersuisut Tunngaviusumik inatsisissaq pillugu isumalioqatigiissitap siulittaasoqarfianit allakkatigut saaffiginnissut aallaavigalugu Inatsisartunut ilaasortaanngitsut aningaasarsiaqarnissaat pillugu eqaannerulersitsisussamik suliakkiissummi allannguinissap Naalakkersuisunit akuerineqarnissaa naatsorsuutigineqarpoq, Vittus Qujaukitsoq allappoq.
