Tunngaviusumut inatsisissamut isumalioqatigiissitaq unittooqqasoq
Tunngaviusumik Inatsisissaq pillugu Isumalioqatigiissitami siulittaasoq Doris J. Jensen, sinniisua ilaasortarlu novembarip qaammataani tunuarput. Taakkuli kingoraartissaannik toqqaasoqarsimanersoq Isumalioqatigiissitaq suli ilisimatinneqanngitsoq, Kuupik V. Kleistip oqaatigaa.
- Naamik, taamatut suli ilisimatinneqanngilagut. Tassami Naalakkersuisut ilaa toqqaasussaatitaagamik, siulittaasup tulliata Kuupik V. Kleistip oqaatigaa
Doris J. Jensenip isumalioqatigiissitamit ilaasortaajunnaarnerminut ilaatigut sulinikkut atukkat pitsaannginnerannik isumalioqatigiissitallu pingaaruteqarnerata tunulliutinneqarnerannik tunngavilersuivoq. Tamanna isumalioqatigiissitami siulittaasup tulliata isumaqatigalugu oqaatigaa.
AAMMA ATUARUK Doris J. Jensen Tunngaviusumik inatsisissaq pillugu isumalioqatigiisitamit tunuartoq
- Aap, isumaqatigaara aamma ataatsimiititaliami ataatsimoorluta saaffiginnissutigaarput tamanna naalakkersuisunut.
Tunngaviusumik Inatsisissaq pillugu Isumalioqatigiissitamit ataatsimoorlutik saaffiginninnerminni Isumalioqatigiissitami sulinermi atukkatik naammaginagit oqariartuuteqartarsimasut, Kuupik V. Kleist nassuiaavoq.
- Ilaatigut akissarsiaritinneqartut aammalu piffissamik tunngasumik atugassarititaasut. Taavalu aamma suliakkiissutit oqaasertalersorneqarneranik tunngasumik aamma allannguinissamik siunnersuuteqarpugut.
Kuupik V. Kleistili isumalioqatigiisitamit tunuarniarani KNR-imut erseqqissavoq. Taannalu najoqqutaralugu Isumalioqatigiissitaq Naalakkersuisunut arlaleriarluni saaffiginnittarsimavoq,.
AAMMA ATUARUK Inatsisit Tunngaviusussat pillugit Isumalioqatigiissitat ataatsimeeqqammersut
- Kingullermik eqqaamanerlunngikkukku Inatsisartut ataatsimiilernerisa nalaani ukiaq manna saaffiginnissutigaarput.
Saaffiginninnerilli suli kinguneqanngitsut taanna oqarpoq.
Isumalioqatigiissitamit naalakkersuisunut saaffiginnittarnerisa saniatigut Doris J. Jensenip, ilaasortallu marluk tunuarnerat isumalioqatigiissitap sulineranut kinguarsaataasoq, taavalu aamma kingoraartaasussat aallartisarnissaat kinguarsaataassasoq siulittaasup tullia Kuupik V. Kleist naliliivoq.
- Soorunalimi sulinerup kinguaallannissaa naatsorsuutigineqartariaqarpoq. Inuit nutaat toqqarneqartussaammata aammalu ilaatigut taakkua naatsorsuutigaara aallaqqaataaniit paasiniaaqqaartariaqassasut. Suliamullu killiffimmik aamma paasiniaaqqaartariaqassallutik, Kuupik V. Kleist oqarpoq.
AAMMA ATUARUK Tunngaviusumik Inatsisissaq pillugu isumalioqatigiissitaq aallarteqqilertoq
Isumalioqatigiissitamili ilaasortat Naalakkersuisut Inatsisartullu utaqqiinnaleqqallugit, Isumalioqatigiissitami siulittaasup tullia oqarpoq.
- Tassa nalunngiinnarpara Naalakkersuisut Inatsisartullu Inatsisartut ataatsimeeqqammerneranik ulluni kingullerpaani allannguutissanik suliaqartut, kisianni sukumiisumik suli ilisimanngilarput sorpiaat allannguutaanersut.
Tunngaviusumik Inatsisissaq pillugu Isumalioqatigiissitami siulittaasup tulliata Kuupik V. Kleist oqarpoq.
Tunngaviusumik Inatsisissaq pillugu Isumalioqatigiissitap tunngaviusumik inatsisissamut missingiut 2021-mi juunip ulluisa 21-anni naammassinissaanik anguniagaqaraluarpoq, tamannali isumalioqatigiissitami siulittaasup tulliata maanna ilimaginngilaa.
