Isumaginninnermut Aqutsisoqarfimmi sulisut marloriaammik amerlinerat apeqquserneqartoq
Namminersorlutik Oqartussat Isumaginninnermut Aqutsisoqarfianni atorfillit ukiut tallimat kingulliit ingerlaneranni marloriaammik amerlassuseqalerput.
Isumaginninnermut Aqutsisoqarfimmi atorfillit 2018-imi 46-pput, taakkulu siorna 108-nik amerlassuseqarput
Inatsisartuni ilaasortap, Siumumeersup, Lars Poulsenip sooq taama amerlatigisunik atorfinitsitsisoqarnersoq Isumaginninnermut Aqutsisoqarfimmillu aningaasartuutit qanoq annertutigilernerat paaserusuppaa.
Taassuma Isumaginninnermut Aqutsisoqarfimmi atorfillit amerlassusaat ukiut tallimat kingulliit ingerlaneranni amerlingaatsiarsimanerat maluginiarpaa, taamaammallu sulisut taama amerlatigisut aningaasallu qanoq atorneqarnersut paaserusuppaa.
Taassuma tamanna Naalakkersuisunut §37-mut apeqqutitut allappaa.
Allanngortiterineq sulisunut marloriaatinngortitsisoq
Isumaginninnermut Aqutsisoqarfimmi isumaginninnermi siunnersortit 17-iusut, suliniuniutinullu atorfillit 16-init 18-nut ukiut marluk ingerlaneranni amerlisimasut, Meeqqanut, Inuusuttunut, Ilaqutariinnut Peqqissutsimullu Naalakkersuisup, Mimi Karlsenip Lars Poulsenimut akissutaani allassimavoq.
Naalakkersuisup Mimi Karlsenip Lars Poulsenimut akissuteqarnermini nassuiaatigaa:
- Susassaqarfinnik allannguinissamut isumaqatigiissutip kingunerisaanik PAARISA 2019-imi Isumaginninnermut Aqutsisoqarfimmut nuunneqarpoq, tamannalu tunngavigalugu sulisut 22-nik amerlineqarput. Susassaqarfinnik allannguisoqaqqereersoq 2022-mi suli atualinngitsunut suliassaqarfik Ilinniartitaanermut Aqutsisoqarfimmiittoq sisamanik sulisoqartoq Isumaginninnermut Aqutsisoqarfimmut nuunneqarpoq.
AAMMA ATUARUK Innarluutillit illersuisuat isumaginnittoqarfinnut: Ilaqutariippassuit nukillaartarput
Taamaammat allannguineq Isumaginninnermut Aqutsisoqarfiup sulisuisa marloriiaatinngornerannut nassuiaatissaavoq. Mimi Karlsenillu akissummini suliniutit arlallit nunatsinni meeqqanut inuusuttunullu atugarliortunut suliniutinut pitsanngoriaataasussat Kalaallit-Danskillu suleqatigiinneranneermata atorfiit arlallit killiligaasut aamma allappaa.
Tamatuma saniatigut suliassat arlallit TUSAANNGA-meersut, meeqqat pillugit angalasartuneersut Task Force-imeersullu sulisoqarnerulersitseqataasimasut Naalakkersuisoq allappoq.
Sulisoqarnerulernerlu aningaasartuuteqarnerulersitsimavoq. Aqutsisoqarfik 2018-imi Aningaasanut Inatsimmit 33 millionit koruunit missaannik, siornalu 44 millionit koruunit sinnerlugit aningaasaliiffigineqarsimavoq, tassa aningaasaliissutit 10 millionit koorunit missaannik qaffassimapput.
Naalakkersuisup akissutaa Lars Poulsenip naammagisimaarpaa:
- Akissutigineqartut kisitsisit soorunami paasinarluinnarput. Kisianni taamaakkaluartoq kikkut sulisorineqarnersut taavalu suminngaanniit aningaasalersorneqarsimanersoq paasiniassallugu soqutiginartippara. Malitseqartitsinissannut taanna tunngavigaara.
