Istanbulimi timmisartoqarfissuarmi qaartartumeerisoqarnerani 50-it missaat toqutaasut
Istanbulip timmisartoqarfissuata Atatürkip saassunneqarnerani inuit 50-it missaat toqutaapput amerlaqisullu ikiligaallutik.
Timmisartoqarfissuup Atatürkip saassunneqarnerata kingorna ajunaartut maanna "50-it missaanniittut", Tyrkiami atorfilittat qullersat ilaat AP-mut taama ilisimatitsisoq nutaarsiassaqartitsivik Twitterimi taama allappoq.
Istanbulip guvernøriata Vasip Sahinip tamanna sioqqutilaarlugu uppernarsarpaa inuit 28-t toqutaasimasut 60-illu missaat ikiligaasimasut. Guvernørip ilanngullugu oqaatigaa imminut pilliutigitigalutik qaartartumeerisut pingasuusimasut.
Tyrkiami inatsisinik atuutitsinermut ministerip, Bekir Bozagip, siusinnerusukkut aamma uppernarsarpaa timmisartoqarfissuarmi marloriarluni qaartitsisoqarnerani ikinnerpaamik qulit toqutaasimasut ikinnerpaamillu 20-t ikiligaasimasut.
Tv-qarfiup Haberturkip tamanna sioqqullugu nalunaarutigaa 40-t ikiligaasimasut, kisitsisilli taakku sivitsunngitsoq 60-inngortinneqarput, taakkunannga arfinillit ikiligaarujussuarsimallutik, Tyrkiami naalagaaffiup nutaarsiassaqartitsivia Anadolu taama allaaserisaqarpoq.
Imminut pilliutigitigaluni qaartartumeerisup ataasiinnaanera inatsisinik atuutitsinermut ministerip siusinnerusukkut upperarnarsarsinnaasimavaa.
- Paasissutissat pissarsiarisakka naapertorlugit peqqarniisaarniaq Atatürkip timmisartoqarfissuata nunanut tamalaanut aallartarfiata isaariaani aallaammik kalasjnikovimik eqqaassivoq kingornalu imminut qaartilluni, ministeri Tyrkiap inatsisartuinut taama nalunaaruteqarpoq.
/ritzau/Reuters