Issittumi uumasoqarneq naasoqarnerlu nakkutigineqarnerulissaaq
Ilisimatusartut, Issittumilu nunat allat inuiinit aallartitat Issittumi allannguutit, pinngortitamilu imartanilu avatangiisini takusartakkatik oqallisiginiarlugit sapaatip akunnerata siuliani Nuummiipput.
Issittumi uumassusillit pinngortitamilu avatangiisit alapernaarsorneqarnerisa siunissami qanoq ililluni nukittorsarneqarsinnaanersut tassani eqqartorneqarpoq.
Sukkasuumillu allanngoriartortoqarpoq, tamannalu pillugu alapernaarsuineq, tassungalu atatillugu suleqatigiinneq nukittorsarneqartariaqartoq, Pinngortitaleriffiup tusagassiutinut nalunaarummi allaaseraa.
AAMMA ATUARUK Issittumi siunissami aalisarneq nalorninartoq
Ilisimatuut nunap inoqqaaviniillu sinniisut Issittumi nunanit assigiinngitsuneersut sapaatip akunnerata siuliani Nuummiipput. Nuummiinnerminni issittumi uumasoqassuseq naasoqassuserlu pillugit eqqartuisoqarluni. Aammattaaq issittumi pinngortitami imaanilu avatangiisini allannguutit takuneqartartut ilaatigut oqallisigaat.
Allanngoriartupiloortoqartoq
Ilisimatusartut assigiinngitsut, Issittumilu nunat inoqqaavisa aallartitaat assigiinngitsut Pinngortitaleriffimmi Nuummi ataatsimiileruttorput, Issittumilu uumassusillit avatangiisillu allanngoriartupallattut taakku isumaqatigiissutigaat, alapernaarsuinerullu nukittorsarneqarnissaa, suleqatigiinnerullu nukittorsarneqarnissaa kissaatigineqarpoq:
- Uumassusillit assigiinngissitaarnerini allannguutit issittumi inuunermut sunniuteqarput. Uumasunit, Issittumi inuit uumassutigisaannit arlallit pisariuminaallisimapput, immap sikua nungukkiartorpoq, issittumi uumasooqatigiit avannamut nussorput aammalu kujasinnerusumi uumasooqatigiit nunamut takkussuupput, Pinngortitaleriffik allappoq, nangillunilu:
- Ilisimatusartunit oqaatigineqartut malillugit issittumi uumassusillit assigiinngissitaarneri pinngortitamilu pissutsit allanngoriarujussuartussaanngorput. Taamaattumik susoqarnissaa pillugu ilisimatusarnikkut siunnersorneqarnissaq, taamaalillunilu Issittumi innuttaasut allannguutinut piareersimanissaat pingaaruteqarpoq, pinngortitaleriffik taama allaaserisaqarpoq.
Allannguutinik alapernaarsuinerup qanoq ililluni ingerlateqqinneqarsinnaaneranut nukittorsarnissaanullu siunnersuutinik saqqummiussisoqarnissaa ataatsimiinnermi siunertaavoq.
