Issittumi uuliasiornerup unitsinneqarnissaa Obamap piareersimaffigigaa

Obamap Trudeauillu Issittup imartaani uuliasiorluni qillerinerit akuersissutinillu tunisinerit unitsinneqarnissaannik aalajangernertik marlunngormat avammut nalunaarutigaat.

Chukchit imartaanni Beaufortillu imartaata annersaani uuliasiorluni qillerineq ineqqutigineqassasoq præsident Obamap marlunngormat nalunaarutigaa. Alaskap avannaani avannaata-kitaanilu imartat pineqarput. Aviisilu New York Times naapertorlugu inerteqqutigineqarnissaa akuersissutigineqassagunarpoq.

Taamatullu aalajangerneq Obamap USA-mi præsidentitut iliuusaasa kingullersarissavaat, inerteqquteqarnerullu atorunnaarsinneqarnissaa piffissaligaanngimmat pingaaruteqartupilussuussalluni, danskit aviisiat Berlingske taama allaaserisaqarpoq.

Obama nunap toqqavia pillugu inatsit 1953-imeersoq tunngavigalugu taamaaliorpoq, inatsillu taanna Trumpimit atorunnaarsinneqarsinnaanngitsutut nalilerneqarpoq.

Tamatumunnga peqatigitillugu premierministerip Trudeauip nalunaarutigaa Canadap issittuata imartaani uuliaqarneranik gasseqarneranillu misissuinissamut akuersissutinik tuniniaaneq Canadap unitsikkaa. Aalajangiinerli taanna ukiut tallimakkuutaarlugit nalilersorneqartassaaq.

Inerteqquteqalernermik nalunaarut avatangiisinik illersuiniaqatigiiffiit Alaskami Natural Resources Defence Councilip Greenpeacellu nuannaarutigaat.

Suliniaqatigiiffiulli American Petroleumip piianissamut akuersissutinik mattussiniartoqarnera isornartorsiorpaa.