Issittumi takornarianik angallassisartunngorniat aatsaat taama amerlatigisut
Issittumi takornarianik angallassisarnissamut ilinniarniartut aatsaat taama amerlatigisut aallartipput, siullerpaamillu maanna aamma klassinik marlunnik pilersitsilluni ilinniartoqalerluni. Takornarianik angallassisarneq pillugu ilinniartitaaneq ukiuni sisamani pioreerpoq.
Ilinniartut Nunatsinni tamaneersuupput, Qaanaamit Nanortallip eqqaani Aappilattumut, Nuummiillu Ittoqqortoormiinut. Ilinniartitaanermut pisortaq Henrik E. Nielsen, Campus Kujallermeersoq, taama oqarpoq.
Ilinniartut nutaat 28-t qaammatini arfinilinni ilinniassapput, angusassallu amerlaqaat, misilitsissutissallu aamma amerlaqalutik. Assersuutigalugu Nunatta oqaluttuarisaanera, kulturi, Kalaallit Nunaata sannaa, uumasuilu, oqaatsillu ilinniartitaanermi aamma pingaaruteqarlutik, tassa danskisut tuluttullu oqaluttuarnermut sungiusartoqartussaagami.
Issittumi takornarianik angallassisarneq pillugu ilinniarnerup nalaani aamma Ilulissiartoqartarpoq, takornarialerinermik misilittagaqarnissaq eqqarsaatigalugu sullissinermut sungiusarnissaq pillugu Ilulissiartoqartarluni, Ilulissat tassaammata Nunatsinni takornariaqarfiit annersaat.
Issittumi takornarianik angallassisarneq pillugu ilinniartut ilinniarnertik januaarimi aallartippaat, juunillu ulluisa pingajuanni ukioq manna naammassissallugu. Taamaasillutik aasaanerani sulinissaminnut piareerniassammata, takornarialerisummi angallassisussanik amigaateqartut Henrik E. Nielsenip oqaatigaa.