Issittumi Siunnersuisooqatigiinnut siulittaasussaq Kuupiup naapippaa
- Canadap siulittaasuuffimmini suliassai Kalaallit Nunaannut issittormiunullu attuumassuteqartupilussuupput. Siulittaasoqarfiup suliassai uatsinnut nunanullu tamalaanut pingaaruteqassapput, pingaartumik Issittup annertusiartuinnarmik sammineqarnerata malitsigisaanik. Issittormiut immikkut sammineqaannarnissaat uatsinnut pingaaruteqarpoq. Issittumi Siunnersuisooqatigiit aalajangiussaat angerlarsimaffitsinnut inuuniarnermilu atukkatsinnut sunniuteqartarput. Taamaammat Issittumi Siunnersuisooqatigiinni oqaloqatigiinnerni aalajangiinernilu pingaarulinni tamani issittormiut qitiusumik inissisimasarnissaat pingaaruteqartupilussuuvoq, Kuupik Kleist Villy Søvndalilu ataatsimoorlutik tusagassiorfinnut nalunaaruteqarlutik oqarput.
Canadamiut siulittaasuuffimminni pingaarnertitassaat tassaapput Issittumi innuttaasut: ”Development for the People of the North” pingasunik immikkuutaartunik immikkortortalik: aatsitassarsiorneq, imaani isumannaallisaaneq piujuaannartitsinissarlu. Naalagaaffeqatigiit siulittaasunngortussanut naatsorsuutigisaat ullumi ataatsimiinnermi aamma eqqartorneqarput.
-Naalakkersuisut siulittaasuallu peqatigiilluta Leona Aglukkaqimik naapeqateqarnissatsinnut periarfissaqarsimanerput nuannaarutigaara. Issittumi Siunnersuisooqatigiit ukiuni kingullerni pissanganartupilussuarmik ineriartorfiusimapput, susassaqarfiit pingaarutillit arlariit pillugit nunat ilaasortaasut akunnerminni pituttuisumik aalajangiiffigineqarsimallutik. Tamanna imaani annaassiniarnerup iluani takoreerparput, aamma uuliakoornerup suliarineqartarnera suliassatut pingaarutilittut isigaarput. Tamanna nunat issittumiittut akornanni suleqatigiilluartoqarneranut takussutissaalluarpoq. Canadap pingaartillugit suliariniagai Naalagaaffeqatigiinni nammineq anguniakkatsinnut naapertuulluarneri pitsaasuuvoq, danskit nunanut allanut ministeriat Villy Søvndal oqarpoq.