Issittumi Sakkutooqarfiup akiuussutissat ataasinngorpat ingerlatissagai
Peqqinnissaqarfimmit nakorsaaneqarfimmiillu akiuussutissalerisut eqimattat Qeqertarsuatsiaanut Paamiunullu ataasinngorpat aallassapput.
Taakku umiarsuarmut Knud Rasmussenimut ilaassapput. Issittumi Sakkutooqarfik akiuussutissanik peqqinnissaqarfimmilu sulisunik kujammut ingerlassissaaq.
Illersornissaqarfik coronamik akiuussutissanik assartuinissamut aatsaat siullermeertumik ikiuilerpoq.
AAMMA ATUARUK Akiuussutissat nassiussat tulliit nunatsinnukaanneqalersut
Kingulliunavianngilarlu. Issittumi Sakkutooqarfimmi umiarsuit qulimiguullillu atorlugit akiuussutissanik peqqinnissaqarfimmilu sulisunik nunatsinni sumiiffinnut tikikkuminaatsunut ingerlassisarniartoq, Sakkutooqarfik paasissutissiivoq.
Nunatsinni akiuussutissalersuineq
- Akiuussutissat puiaasaarakkat nassiussat siulliit 1305-iupput. Taakkua ukiortaap kinguinnngua tikipput.
- Nassiusst tullii puiaasaaqqat 975-iupput. Taakkua sapaatit akunnerisa aappaanni tikipput. Taakkunannga Qaqortumi, Aasianni Sisimiunilu inutaasut peqqinnissaqarfimmilu salliullutik sulisut kapineqarput.
- Nassiussat pingajui aamma puiaasaaqqat 975-iupput.
- Akiuussutissaq – 70 gradip aamma -80 gradip akornanni nillertigisumiitinneqassaaq. Taamaammat assartoruminaappoq.
- Akiuussutissaq, akuerineqarluni nunatsinnut nassiunneqartussaaq, tulleq amerikamiut nakorsaasiorfiata Moderna ineriartortitaraa.
- Kalaallinut inuiaqatigiinnut Nuummi illoqarfinniluunniit annerni najugaqanngitsunut akiuussutissiinissamut ikiuinissaq suliassaavoq pingaarutilik, tassanilu ikiuunniarpugut, Issittumi Sakkutooqarfiup pisortarigallagaa, kommandør Dan B. Termansen oqarpoq.
Marlunngornermi pingasunngornermilu akiuussutissiisoqassasoq
Nunatta isorartussusaa, sikoqarnera, silarluttarnera sumiiffiillu ilaannut ungasittarnera akiuussutissamik peqqinnisaqarfimmilu sulisunik isorliunerusuniittunukartitsiniarneq ajornakusuungaatsiarsinnaavoq.
Assersuutigalugu illoqarfiit nunaqarfiillu mittarfeqanngitsut umiarsuarnit nalinginnaasunit tikinneqarnissamut ingerlavissaanngillat.
Issittumi Sakkutooqarfiup oqarnera naapertorlugu akiuussutissat userinissaannut tunngatillugu – aalatinnissaannut nillorsimatinnissaannullu eqqortumik ingerlatsisoqarsinnaavoq.
Peqqinnissaqarfimmi sulisut umiarsuarni aamma sinissinnaapput.
AAMMA ATUARUK Akiuussutissalersuinerit ingerlapput: Sumiiffinni ukunani kapuisoqassasoq
Kapuutit marlunngornermi Paamiuni atorneqassapput.
Tassanilu innuttaasut 65-init qummut ukiullit, paaqqutarineqarfinni najugaqartut aamma peqqinnissaqarfimmi paaqqutarinniffinnilu sulisut akiuussutisserneqassapput.
Qeqertarsuatsiaani innuttaasut 16-ileereersimasunit qummut pingasunngornermi akiuussutissamik kapitissapput.
Qeqertarsuatsiaani Paamiunilu akiuussutissamik kapuisoqareerpat Nunatta avannaa tunulu tullinnguutissapput – taakkunanimi assartuinissamut periarfissat killeqarnerpaapput.
