Issittumi Sakkutooqarfik nukittorsarneqalersoq

Mannangaarli umiarsuarmik alapernarsuummik nutaamik, issittup imartaani atugassamik, pisisoqassasoq nalunanngereerpoq. Tamatuma saniatigut  timmisartuaqqanik ungasianiit aquttakkanik Nunatsinnik nakkutilliinermi atugassanik pisinissaq isumaqatigiissutigineqaratarsinnaavoq.

Danmarkip nalagaaffiata issittumi iliuusai 120 millionit koruunit nalinginut nukittorsarneqassapput. Taassumalu qaavatigut qulimiguulinnik Seahawkinik pisinissamik sapaatip- akunneranni aalajangertoqarpoq. Seahawkit taakkua sakkutuut imarsiortut Issittup imartaani ilaatigut atussavaat.

Alapernarsuutissaq alapernaaarsuutaarersup Knud Rasmussenip assigissavaa, qulimiguulinnut mittarfeqassalluni, tassalu assersuutigalugu Seahawkimik usisinnaalluni.

Ritzauip paasisai naapertorlugit, isumaqatigiinniarnerni kingullerni ulapaarfiusuni issittumi  iliuusissatut naalakkersuisut saqqummiussaanit 20 millionit koruunit ilanngaatigineqarput. Tamanna issittumi iliutsinut qanoq isumaqassanersoq nalunarpoq, SF-illi oqaaseqartartuata Jonas Dahlip aalajangiusimavaa, issittumi iliuutsit nukittorsarneqartut.

- Issittumi iliuutsinik malunnarluartumik nukittorsaanissaq suli atuuppoq, tamannalu uannit aalajangiisuulluinnarpoq, Jonas Dahl oqarpoq.

Radio24syv naapertorlugu  Issittumi alapernaarsuinermi appaagumiit misileraasoqalissaaq.

Illersornissamut isumaqatigiissutissatut missingiutit arlaat, Radio24syv-p pissarsiarisimasa, naapertorlugu, tamanna timmisartunik ungasianiit aquttakkanik ingerlannneqassagunarpoq. Timmisartut ungasianiit aquttakkat tamakkua Afghanistanimi atortaraat ilisimaneqarneruvoq.

Ilimagisariaqarparpulli timmisartut tamakkua eqqissisimasumik atugassaassasut, tassalu qaartartoqassanngitsut.