Issittumi nersornaasiuttagaq Canadami tunniunneqartoq

Nersornaat The Arctic Inspiration Prize, Arnold Witsigimit, Schweizimeersumit, nulianillu Sima Sharifimit, Iranimeersumit, pilersinneqarpoq. Taakku Canadami nunassinnikuupput.

Nersornaat annerpaaq 5,1 millionit koruuninik aningaasartaqarpoq, Northwest Territoriesimi Nunavummilu meeqqat atuarfiini atuartut soraarummeertussat ilinnialernissaannut ikiorsiissutitut nersornaasiinerulluni. Suliniut taanna Northern Compassimik taaguuteqarpoq.

- Issittoq nukittooq, peqqissoq atuagarissaartorlu, inuusuttut ilinniarluarsimasut aallaavigalugit pilersinneqassaaq, isumallualersitsissaaq, aqutsisut ilaat nersornaasiinermi oqarpoq.

AAMMA ATUARUK Issittup Nobelimut nersornaasiuttagaanik taaneqartartoq tunniunneqarpoq

Nersorniarneqartut akornanni aningaasaliiffigineqarnerpaat aappaattut inissittoq tassaavoq suliniut Kamajiit. Erinarsortartup tusaamasap Susan Aglukarkip inuusuttut atuarfimmiit aninatik atuartuuinnarlutillu imminut toquttarnerup akiorniarneqarnissaanut suliniutaa tassani nersorniarneqarpoq.

Inuusuttut inuunerinnerunissaat siunertaavoq. Peqqissunik nerisaqartinneqarput, najugaqarfiisalu eqqiluitsuunissaat suliniutaalluni. Naggueqatigiit Inuit ileqqutoqaat oqaasiilu aallaavigalugit inuusuttut sammisassaqartinneqarput, Susan Aglukark oqarpoq.

Nersornaaserneqartut pingajuat tassaavoq suliniut Nunavut Law Program. Suliniut taanna kalaallimit Aaju Peter-mit, Iqalunni najugaqartumit, aqunneqarpoq.

Aaju Peter inatsisilerinermi ilinniarsimasuuvoq, Nunavummiullu inatsisilerinermi ilinniartitaanerannut atatillugu suliniutaalluni.

Suliniutit katillugit arfineq-marluk The Arctic Inspiration Prizemik nersornaaserneqarput. Nersornaat taanna aqqutigalugu Canadap issittortaani ulluinnarni inuuniarnermut iluaqutaalluarsimavoq.