Issittup Nobelimut nersornaasiuttagaanik taaneqartartoq tunniunneqarpoq

Angutit suliniaqatigiiffiata Unaaq-p, Inukjuarmeersup, nunaqarfimmi tassani inuusuttunut suliniuteqarnini pillugu 500.000 koruuninik tunineqarpoq. Inukjuarmi inuusuttut angutit suliniaqatigiiffiat Unaaq aqqutigalugu piniariartinneqarlutillu aalisariartinneqartarput, inuusuttut naggueqatigiit Inuit ileqqutoqaannik Unaaq aqqutigalugu ilinniartinneqartarnerat nersorniarneqarluni.

Inukjuarmi inuusuttut pillugit angutit qanoq iliuuseqartarnersut, nuliaasut uiminnut apeqqutigaat, angutillu inuusuttut taamaalinikkut piniarnermik aalisarnermillu ilinniartittalerpaat.

Chesterfield Inletimi, tassa Illuligaarsummi naggueqatigiit Inuit inuusuttut qajartorsinnaanissaannik ilinniartinneqarnerat, qaanniorsinnaanermillu aamma ilinniartinneqarnerat nersorniarneqarpoq, 500.000 koruuninik aamma tunineqarlutik. Inuusuttummi 150-it qajartorsinnaalerlutillu qaanniorsinnaalerput, kalaallillu qajaannik arlalinnik aamma sanasimallutik.

Nersornaat The Arctic Inspiration Prize, Arnold Witsigimit, Schweizimeersumit, nulianillu Sima Sharifimit, Iranimeersumit, pilersinneqarpoq. Taakku Canadami nunassinnikuupput.

Canadap issittortaani suliniutinut taamaasillutik namminneq aningaasaatiminnit agguaassisarput.

Northwest Territoriesimi naalakkersuisut siulittaasorisimasaat Nellie Cournoyea nersornaasiinermi oqalugiarpoq:

- Suliniutit uku allanalaarsinnaapput, ilaatigut uissuumminarsinnaasut, Nellie Cournoyea oqarpoq.

Nersornaatip The Arctic Inspiration Prizep tunniunneqarnerani uissuumminartumik aamma pisoqarpoq, Arnold Witsigimi nuliilu Sima Sharifip unnuk taanna nalunaarutigaat aningaasaatimi 290 millionit koruunit The Arctic Inspiration Prizemut tunniunniarlugit.