Issittumi inatsisartut Finlandimi ataatsimiilerput
Issittumi inatsisartut illoqarfimmi Inarimi samet nunaanniittumi samet inatsisartuisa ataatsimiittarfianni ataatsimiissapput. Nunatsinni ataatsimiittoqarmat Inatsisartut ataatsimiittarfiat ataatsimiiffigineqarpoq.
- Isumassarsianik pissarsiaqarnartarpoq issittumi inatsisartut allat ataatsimeeqatigalugit. Tassami arlalitsigut unammilligassagut assigiissuteqartut oqaluuserisarpagut. Aqagu politikkikkut oqaluuserisassat sammineqassapput tassani samet inatsisartui aallarniuteqassapput. Folketingi sinnerlugu peqataavunga Folketingillu aalajangigai tunngavigalugit isumaqatigiinniarnerni peqataavunga, Sara Olsvig Finlandimiit oqarpoq.
Inatsisartut ataatismiinnerisa saniatigut samet nunaat takornariarneqassaaq. Tassani qangaaniilli ileqqut tammatsaaliorneqarlutik ullutsinni nutaaliaasuni attanneqarput. Tuttuuteqarneq samet inuussutissarsiutaanni pingaarnersaavoq tuttulu pingaarnertut sammineqarumaarpoq samet nunaanni takusassarsiornermi.
- Assut pissanganarpoq samet tuttuuteqarnerata takuniarnera. Atuarfimmut aamma pulaarpugut tassanilu tuttu qanoq atorneqartarnersoq atuartitsinermi ilaatinneqarpoq aammalu neqilerivik ilisimasanillu katersuivik takuniarpagut. Tassani tuttut nujuitsut nujuartallu malittarineqarput. Samet suleriaasiat takullugu assorsuaq nersualaarnarpoq, Sara Olsvig oqarpoq.
