Issittormiut nipaat angalapput
Iluatsilluartumik Københavnimi Kalaallit Illuutaanni aggustip 23-at tusarnaartitsipput. Maanna issittormiut arnat sisamat taakku Aasiannut, Sisimiunut Nuummullu tusarnaartitsiartulerput.
Nipiaa Rock Festivalimik aaqqissuisuniit Peter Olsen Whitehorsemi Arctic Winter Gameseqarnerani najuuppoq. Tassani 'A Circumpolar Soundscape' iluatsilluartumik tusarnaartitsipput. Tusarnaartitsinerup kingorna Peter Olsen qulanngivippoq pinngitsoorani 'A Circumpolar Soundscape' nunatsinnukartinneqartariaqartut.
Maannalu tassa 'A Circumpolar Soundscape' katersuuteqqipput. Erinarsortut tassaapput Leela Gilday, Sylvia Cloutier, Diyet aamma Nive Nielsen. Nipilersullaqqissorsuit ingiortaat tassaapput: Jan De Vroede, Alain Auger, Seraphine Stragier, Tomas Desmet aamma Adriaan Jespers.
Maanna Aasianni appissapput aggustip 30-at kingornalu Sisimiunut ingerlaqqissallutik. Nuummi illorsuarmi timersortarfimmi septemberip aallaqqaataani aamma nipilersussapput.
Workshopeqarluni sammisaqarnermi niviarsissat taakku imminnut naapipput.
- Suleqatigiilernerminni suminngaanneerfitsik tunngavigalugu assigiissuterpassuit nassaarivaat – nipilersornerinnarmiunngitsoq aammali kinaassutsip tungaatigut, Sisimiuni kulturip illorsuani Taseralimmit Arnajaraq Støvlbæk nalunaarpoq.
Taakku imminnut ungasillutik ulluinnarni najugaqarput taamaattoq assigiissutaat ima kimittutigaat periarfissaqartillugu appisimaaqatigiittarlutik.
Sisamanngornermi unnukkut Aasianni appissapput. Taava kulturip illorsuani Taseralimmi tallimanngornermi unnukkut arfineq pingasup qeqqa appisimaassapput ataatsimuussusermik paasinittaasertik takutissallugu.
- Suleqatigiinneq tamanna erinnanik taallanillu nutaanik pilersitsivoq aammali erinarsortartut namminneerlutik atortagaat alutornaqisumik ataqatigiissarneqarluarsimallutik, Arnajaq Støvlbæk nalunaarpoq.