Issittoq pillugu periusissaq taperserpaat
- Issittoq pineqartillugu partiilersorluni politikikkut assortuunnerit atorfissaqanngillat, akerlianilli Danmarkimi isumaqatigiissuteqarnissaq pisariaqartinneqarpoq. Uanga takorusunneruvara isumaqatigiissutigisinnaasatsinnik oqaloqatigiisssuteqarnissarput, taanna oqarpoq.
Danmarkip, Savalimmiut Kalaallillu Nunaata ataatsimoorussamik Issittoq pillugu periusissaq sapaatip akunnera kingulleq saqqummiuppaat, aammalumi Socialdemokraatit naalakkersuisuusimagaluarpata saqqummiunneqartoq allaanerussuteqangaassanngikkarluarpoq, Henrik Dam Kristensen oqarpoq.
- Periusissaq maanna saqqummiunneqartoq isumaqatigaara. Taanna suleqatigiinnikkut Kalaallit Nunaata annertuumik sunniuteqarfigisaanik pilersinneqarpoq.
Aammattaaq Henrik Dam Kristensenimit naqissuserneqarpoq Issittoq nunat avannarliit isiginiartariaqarmassuk pingaaruteqartoq.
- Nunat Avannarliit Siunnersuisoqatigiivisa Danmarkillu Issittup pingaartinneqarnissaa annertuumik soqutigisaraat, suliassaqarferujussuarlumi naalakkersuinikkut oqallinnitsinni ilaalluinnarpoq. Taamaattumik sikuunikilliartortarnera imaanilu sillimaniarnissaq pillugit unammillernartut pingaartittariaqarpagut.