Issittoq pillugu Alaskami ataatsimeersuartut
Ataatsimeersuarnerup taaguutaa tassaavoq "Global leadership", Nunarsuaq tamakkerlugu aqutsinermik nutserneqarsinnaasoq. USA-p Issittumi pissutsinik ukiuni makkunani aqutsisuunera ataatsimeersuarnermi pingaarnertut eqqartorneqassaaq. USA-p nunanut allanut tunngasunut ministeriata John Kerryp ataatsimeersuarneq aqutsisuuffigissavaa.
Inuit 450-it missaat, nunanit 20-neersut, ataatsimeersuaqataassapput, nunat ilaat nunanut allanut tunngasunut ministerii peqataassapput. Canadalli Ruslandillu nunanut allanut tunngasunut ministerii peqataassanngillat, naak Issittumut tunngatillugu nunat taakku marluk pingaarutilittut inissisimagaluartut.
Peqataasussat affaasa missaat Alaskaminngaanneersuussapput, nunallu inoqqaavineersuussallutik.
Ataatsimeersuarnissap Alaskamuinnaq pingaaruteqarani, Nunarsuulli sinneranut aamma pingaaruteqarnissaa, USA-p nunanut allanut tunngasunut ministereqarfianeersup ataatsimeersuarnissaq sioqqullugu apersorneqarnermini ilaatigut oqaatigaa.
AAMMA ATUARUK Obamap Alaskami inuit naapissavai
Ulluni marlunni ataatsimeersuarnermi angusat eqikkarlugit nalilerneqarnerat John Kerryp ataatsimeersuarneq naggaserlugu ullumi saqqummiutissavaa. Nunat Issittumut killeqarfillit arfineq-pingasut silap pissusianut atatillugu iliuuserisassatut pilersaarutaat aallaavigalugit assigiinnerusumik politikkeqalernissaq pillugu suliat nanginneqassapput, silap pissusia pillugu Parisimi COP 21-mik taallugu novembarimi ataatsimeersuartoqarnissaa eqqarsaatigalugu assigiikannersumik politikkeqalernissaq sulissutigineqassalluni.
USA-mi innuttaasut ataatsimut isigalugu Issittoq pillugu ilisimasakippallaartut oqaaseqartitap oqaatigaa, annerusumik ilisimasaqalernissaq pingaaruteqarnerarlugu.
USA-p præsidentia Barack Obama ataatsimeersuarneq naggaserlugu aamma peqataassaaq, tassani oqalugiassalluni. Taamaalereerpat Alaskami illoqarfinnut nunaqarfinnullu kingorna angalassaaq.
