Issittoq pillugu Aarhusimi ataatsimeersuartoqalersoq
![](/sites/default/files/styles/image_934x467/public/article_images/aarhus_uni_foto_marc-olivier_bergeron.jpg?itok=WzQhyAeF)
Tamannalu Aarhusip Universitetiata ukiumoortumik MatchPoitn Seminareqartitsinerani ukiormanna Issittumut tunngatinneqartussami pissaaq.
Ilisimatuut, politikerit isummersortartullu allat nunanit assigiinngitsuneersut Issittumi eqqisseqatigiinnerup attatiinnarnissaanut Issittumilu sillimaniarnerup nukittorsarnissaanut ataatsimeersuarnermi siunnersuusiussapput.
Nunat avannarliit nunallu issittumiittut suleqatigiinnerat Issittumilu ineriartortitsineq aamma sammineqassapput, ilaatigut avatangiisinik illersuineq issittumilu nunat inuiisa namminersortuunerat sammineqassallutik.
Oqalugiaateqartussatut qaaqqusat ilagaat Inuit Ataqatigiit siulittaasuat Sara Olsvig, folketingimut ilaasortat nunatsinneersut Aaja Chemnitz Larsen (IA) aamma Aleqa Hammond (S) kiisalu geologiimi professori Minik Rosing.
Aammattaaq ilisimatuut politikerillu ilaatigut Norgemeersut, Savalimmiuneersut, USA-meersut Canadameersullu ataatsimeersuarnermi oqalugiartussatut qaaqquneqarsimapput.
Ataatsimeersuarneq Aarhusip Universitetiani sisamanngornermi tallimanngornermilu ingerlanneqassaaq.