Issittoq pillugu aallartitanngortussaq aajuna
Nunanut allanut ministeriaqarfiup iluani allanngortiterineq pissutigalugu maanna issittoq pillugu aallartitaasoq Klavs Holm OECD-p aallartitaatut Parisimi ukiormanna aggustip aallaqqaataani atorfeqalissaaq. Nunanut allanut ministerip tassunga taarsiullugu Erik Vilstrup Lorenzen issittoq pillugu aallartitatut atorfimmut toqqarpaa. Taassumalu atorfik pilerigisamisut eqqaavaa:
-Canadami aallartitatut atorfeqarsimanerma nanginneratut isigaara. Canada Issittumi Siunnersuisooqatigiinni siulittaasunngortussaavoq, Kalaallit Nunaallu nunat sanilerisaata annerit aapparaat. Taamaammat Issittumut Kalaallit Nunaannullu tunngasut ilarpassui Canadami pingaartinneqartupilussuupput, Erik Vilstrup Lorenzen, Canadami aallartitatut sulinerminut atatillugu marloriarluni Kalaallit Nunaanniissimasoq oqarpoq.
Danmarkip Canadami aallartitaatut 2009-miilli atorfeqarsimavoq, Kalaallit Nunaatalu Canadami aallartitaatulli aamma imminut isigaluni. Tamanna sioqqullugu EU-mut tunngasunik suliaqarsimavoq, ilaatigut statsministeriusimasumut Anders Fogh Rasmussenimut EU pillugu siunnersortaanertut atorfeqarsimalluni.
Issittoq pillugu aallartitatut sulileruni pingaarnertut sammisassamisut takorluugai tassaapput, imaani sillimaniarneq, avatangiisinut tunngasut uuliasiornerlu. Siulimili suliai nangillugit aamma EU-p puisip amiinik eqqusseqqusinnginnera samminiarpaa.
-Puisit pillugit apeqqut pingaaruteqartupilussuuvoq. Canadap avannarpasissuani asserluinnaanik ajornartorsiortoqarpoq - aamma aningaasatigut kingunerisaanut tunngatillugu, taamaammat ajornartorsiut arajutsisimanngilara. Eqqusseqqusiunnaarnermi Inuit ilanngunneqannginnissaat pillugu paasititsiniaanissaq Issittoq pillugu maanna aallartitaasup suliniuteqarluni aallartissimasai nangikkumaarlugit neriorsuivoq.
Naalakkersuisut siulittaasuat Kuupik Kleist, aallartitap taarserneqarnera naammagisimaarneraa paasiniarlugu oqaaseqartinniaraluaratsigu iluatsissinnaasimanngilarput.
