ICC: Issittoq eqqissinermuinnaq piussaaq
Taamaammat issittoq eqqissisimasumik piunissaanik siunertaqartumik aaliangersaasoqarnissaa ilaatigut sulissutigineqassasoq Kalaallit Nunaanni ICC-mi præsidenti Hjalmar Dahl oqarpoq.
- Ukiuni aggersuni issittoq soqutigineqartorujussuuvoq nunani tamalaaninngaanniik. Pingaartumik aamma silap pissusiata allanngoriartornera ilutigalugu.
Ataatsimeersuarneq Alaskami ingerlanneqassaaq, Inuit Issittumi siunnersuisoqatigiiffianni nunat sisamat ilaasortaatitaqartut tamarmik peqataatitaqassallutik. Taakkualu tassaapput Canada, Kalaallit Nunaat, Rusland Alaskalu.
AAMMA ATUARUK ICC-ip Issittoq eqqisseqatigiiffissatut siunnersuutigaa
Taakkualu saniatigut nunatsinniit naalakkersuisuni ilaasortat ilaat peqataassapput, meeqqat illersuisuat aamma isiginnaarutikkut immiussamik saqqummiisussaalluni.
Nunarsuarmi nunat pissaanillit, soorlu USA, Rusland Koreallu akornanni naalaruluttoqarnerata nalaani ataatsimeersuarneq ingerlanneqassaaq. Taamaattoqarneranillu issittoq eqqugaassanngitsoq pingaarnertut sulissutigineqassaaq.
- Taassuma iluani suliassat ilaat uagut maanngaanniit siunnersuutigisassatta ilagivaat issittup eqqissinermuinnaq piunissaa taanna sulissutigalugu aallartissagipput, Hjalmar Dahl oqarpoq.
Pingaaruteqarluinnarnerarpaalu.
- Issittup nunarsuarmi nunap assingata iluani eqqissinermuinnaq siunertaqartumik atulernissaanik aaliangersagaqarnissaa uanga taanna pingaartittorujussuuara.
Ataatsimeersuarnerli aamma aliikkusersuinertaqassasoq oqaatigaa.
- Nunatsinninngaanniik ilagissavagut Qissiakkut, angutit erinarsortartut. Taavalu qilaatersortartoq Leif Immanuelsen taavalu aamma uagut akunnitsinni nipilersortartoqallattaaratta erinarsortartoqarlutalu taava ilaartornissaat immikkut ilutsinniit naatsorsuutigivarput, Hjalmar Dahl oqarpoq.
ICC-p ataatsimeersuarnera KNR2-ikkut toqqaannartumik malinnaavigineqarsinnaassaaq.
AAMMA ATUARUK ICC-mi 2018-imi ulapittoqassasoq
AAMMA ATUARUK ICC-p Pikialasorsuaq pillugu Isumalioqatigiissitaa nalunaarusiamik saqqummersitsisoq
