Issinnerani isumannaatsumik ima qimussertarit

Aqajannguummerneq, assumukaarneq, issimik kiinnamut kaportitsineq, qimmit isigaasa nunamut tuttarnerannik qeraarpalaaq, qamutit asimi nipaaqisumi ingerlaarujoortut.

Qimminit nukissaqarluartunit qamutinik angallatsilluni, misigisaq pikkunarlunilu alutornarluinnakkajuppoq.

Qimussertillunili pissanganeq, nunallu kusanassusersuanut alutorinninnermik ajornartorsiutinut nuanninngitsumillu misigisaqarnermut allanngoriasaarsinnaasarpoq. Pingaartumik issi isumannaannissarlu eqqarsaatigilluarsimanngikkaanni.

Qimussertartoq Jørgen Kristensen oqarpoq. Taanna ilulissani qimussertartuuvoq, qimmit qamutillu aqunnissaat misilittagaqarluarfigalugit.

Taanna qimusserlutik takusassarsiorniartunut makkuninnga siunnersuutissaarpoq.

1. Sillimanissaq pingaartuuvoq

- Qimusserluni aamma pingaaruteqarpoq, taakkua sillimaniarnermut atortut pigissallugit, soorlu GPS-i qummoroortaatillu, taama Jørgen Kristensen oqarpoq.

Asimut qimusserniartillutit allat ilisimatittarnissaat aamma pingaaruteqarpoq, qimussertartoq taama oqarpoq.

- Sumulluunniit angalagaanni sivikikkaluarpalluunniit aamma taanna pingaaruteqarpoq sumut angalanissaq, taavalu qaqugu uternissamut naatsorsuutigisaqarneq aamma taakkua ilisimatitsissutigissallugit.

2. Oqorsarluarit

Sikukkuulersaaraanni issip unammillernartorujussuunerata akiorsinnaanissaa aamma sillimaffissaavoq.

- Tassunga akiuunnissamut pingaaruteqarpoq, oqortunik atisaqarnissaq issittumut naleqquttunik. Taavalu immaqa sillimmateqarnissaq atisassamaatinik, pingaartumik sikukkut angalaniartilluni, Jørgen Kristensen oqarpoq.

- Soorunami aamma uanga nassartuaannartarpunga nillujuitsimik kissartumik imalimmik.

Qimusserluni misigisaq puigunaatsuusinnaavoq. Assi © : Jørgen Kristensen

3. Misilittagartuut tusaakkit

Qimussissagaanni misilittagaqarsimanissaq pinsariaqartuuvoq, misilittagaqarfiginngikkaannilu qimussertartut misilittagartuut ilinniarfiusinnaapput.

- Angalanermi nalaatanik oqaluttuanik, qanoq ililluni annanniartoqarsimaneranik tamakku aamma pingaaruteqartorujussuusarput tusarnaartassallugit, oqarpoq ersarissaallunilu:

- Isumassarseriataarsinnaaneq pigissallugu taanna pingaaruteqartorujussuuvoq.

4. Apummik assaagit

Ajutoorsimatilluni kissassimaarnissaq pingaarutilerujussuuvoq. Tamanna apummik assaanlluni qarajalionikkut pisinnaaavoq.

- Aput assanneqarsinnaammat taavalu apummut pulagaanni kissarneq paarineqarnerusinnaalluni. Taanna misiginikuugakku innersuussutigisarpara, Jørgen Kristensen taama oqarpoq.

- Soorunami tattussaagaluttuinnarnissaq aamma mianersuuttariaqarpoq taamatut aamma kissassimaartoqarsinnaavoq.