Israelip illersornissaqarfiata Gazamik nunakkut saassussinini annertusigaa
Israelip illersornissaqarfiata islamisiortut Hamasikkut akiorniarlugit Gazamik nunakkut saassussinera annertusineqarpoq, Gaza tamakkerlugu maanna saassussisoqarluni.
Israelip illersornissaqarfiata oqaaseqartitaa nutaarsiassaqartitsivimmut Reutersimut sapaammi taama oqarpoq:
- Israelimi sakkutuut saassussinertik annertusivaat, Hamasip Gazami katersuuttarfii saassunneqalerlutik, Israelip illersornissaqarfiata oqaaseqartitaa Daniel Hagari oqarpoq.
- Peqqarniisaarniat sakkutuutsinnit toqqaannartumik saassunneqarput toqunneqarlutillu, taanna tusagassiortunut Tel Avivimi sassarnermi ilaatigut oqarpoq.
Gaza Israelimit nunakkut sapaatit akunnerisa tallimat matuma siornatigut saassunneqalerpoq.
Israelip Hamasillu akornanni ulluni arfineq-marlunni sakkuaakkunnaarallartoqaqqammerpoq, inunnik tigusarineqarsimasunik ullut taakkua ingerlaneranni ilaatigut paarlaasseqatigiittoqarluni, lastbiilillu ikiorsiissutinik usisut Gazami innuttaasunut anngussinnaasimallutik.
Hamasip sallunaveeqqutitut tigummiagaasa iperagaanissaannut isumaqatigiinniartoqartoqarnerata nalaani qaartartumeerisoqartoq, Israelip ministeriunerata Benjamin Netanyahup aviisi Times of Israel naapertorlugu oqaatigaa. Israelip Qatarimi isumaqatigiinniarnerit arfininngormat qimappai.
Palæstiinamiut maannamut 15.500-nit amerlanerusut Israelip saassussinerani toqutaasimapput. Gazami peqqinnissaqarfiup kisitsisaataasa tamanna takutippaat. Hamasip Gazami peqqinnissaqarfik aqutarivaa.
