Coronavirusimut akiuussutissaq ukioq ataaseq atsaat qaangiuppat atorneqarsinnaalissagunartoq
Naak Israelimiut nualluummut coronavirusimut akiuussutissamik pilersitsilerunaraluartut, akiuussutissap inunnut ukioq ataaseq aatsaat qaangiuppat atorneqarsinnaalernissaa ilimagineqarpoq.
Akiuussutissalli, akiuussutissat allat assigalugit, oqartussanit misiligarneqaqqaarlunilu akuersissutigineqaqqaarnissaa piumasaqaataavoq. Tamannalu sivisusinnaavoq, Kåre Mølbak, Statens Serum Institutimeersoq, oqarpoq.
- Akiuussutissaq misiligarneqaqqaassaaq. Akiuussutissap atorneqarsinnaanera paasiniarneqaqqaassaaq, pingaartumillu inunnut atorneqarsinnaanissaa misissorneqassalluni, Kåre Mølbak oqarpoq.
- Taamaammat akiuussutissaq atorlualertinnagu qulakkiigassarpassuaqarpoq.
- Akiuussutissap inunnut atorneqarsinnaalernissaata ikinnerpaamik ukiumik ataatsimik sivisussuseqarnissaa ilimagaara, Kåre Mølbak oqarpoq.
AAMMA ATUARUK WHO-p coronavirusimut akiuussutaasinnaasut misiliutiginiarai
Coronavirusimut akiuussutissamik sapaatip-akunnerini tulliuttuni pilersitsisimanissartik ilimagalugu, immikkut ilisimasallit Israelimeersut, aviisimut The Jerusalem Postimut oqaatigaat.
Akiuussutissalli akuerineqarnissaata ikinnerpaamik ullunik 90-inik sivisussuseqarnissaa ilimagineqarpoq, akiuussutissallu kingorna taava nioqqutigineqarnialernissaa aamma sivisusinnaasoq oqaatigineqarpoq.
Coronavirusimut, toqqutigineqarsinnaasumut, akiuussutissamik suli peqartoqanngilaq.