WHO-p coronavirusimut akiuussutaasinnaasut misiliutiginiarai

Naalagaaffiit Peqatigiit nunani tamalaani peqqinnissakkut suleqatigiiffiat WHO, nualluummut coronavirusimut akiuussutaasinnaasunik assigiinngitsunik sisamanik suliaqarpoq, taakkunannga ataaseq marlulluunniit ilimagineqarnerpaasut inunnut misiligutigineqassallutik.

Tamanna qaammatit tulliutut pingasut sisamalluunniit ingerlaneranni pissasoq, Naalagaaffiit Peqatigiit nunani tamalaani peqqinnissakkut suleqatigiiffianni ilisimatusartut pisortaata, Soumya Swaminathanip, oqaatigaa.

Akiuussutissarli aatsaat ukiut aappaata affaa qangiuppat atorneqarsinnaalissasoq, Soumya Swaminathan tusagassiortunik katersortitsinermi oqarpoq.

Toqusut amerlisut

Nakorsaatit assigiinngitsut maannakkut atorneqartartut misilittarneqassapput nualluummut coronavirusimut toqqutaasartumut katsorsaataasinnaanersut paasiniarlugu. Nappaat coronavirus Covid-19-imik taaguuteqartinneqalerpoq.

Coronavirusimik Kinami nunap immikkoortuani, Hubeimi, nalunaaquttap akunnerini 24-ni kingullerni toqquteqartut 242-pput.

Ullup unnuallu ingerlaneranni coronavirusimik toqquteqartut aatsaat taama amerlatigipput.

Tunillanneqarsimasut amerlisut

Hubeimi tuniluutileqqaarneraniit tunillanneqarsimasut 15.000-nik amerlimmata tunillanneqarsimasut aatsaat taama amerlatigipput.

Nunarsuarmi inuit katillugit 43.000-init amerlanerusut nualluummik coronavirusimik tunillanneqarsimasut, USA-mi Baltimoremi Johns Hopkins Universityp nalunaarsuinerata takutippaa.