Isornartorsiuineq: Kalaallisut Danmarkimi radiokkut tusarnaagassiortalertussat akunnialuinnarni aallakaatitsisassasut
Danmarkimi naalaartartut kalaallisut Danmarkimi radiortaaq, Radio Inuna, februaarimi tusarnaalissavaat.
Naalaartartulli radiomik taassuminnga ulloq unnuarlu tusarnaarsinnaanissartik naatsorsuutigisinnaanngikkaat, Radio Inunap danskit illussaarsuarnut kultureqarnermullu aqutsisoqarfiannut qinnuteqaataani erserpoq.
Tusarnaagassiortartussat qanoq sivisutigisumik aallakaatitsisarnissaminnut missingersuusiaat, Radio Inunap qinnuteqaataani KNR-ip pissarsiarisimasaani erserput.
Assigiinngitsunik tallimanik ukiuni pingasuni, 2022-miit 2025-p tungaanut, aallakaatitsisassallutik aallakaatitaallu katillutik 137 tiimit 231,5 tiimillu akornannik sivisussuseqassasut, qinnuteqaataanni allaqqavoq.
Ukiuni pingasuni ukiumut qaammatini qulini sapaatit akunnerannut 1tiimip 1,8 tiimillu akornannik sivisussusilimmik radiokkut aallakaatitsisassapput.
Radio Inuna ukiuni pingasuni aallakaatitassiornermut atugassaminik katillutik 7 millionit koruuninik aningaasaliiffigineqarpoq.
Radio Inunalli aallakaatittagassai sivikikippallaartut, nittartakkakkut nutaarsiassaqartitsivimmi Seismomi aaqqissuisuuneq John Præstegaard isumaqarpoq.
AAMMA ATUARUK Qinnuteqartunit isornartorsiuineq: Danmarkimi kalaallisut radioqalernissaanut piumasaqaatit ersarinngitsut
Seismo Kalaallit Københavnimi Illutaallu kalaallisut Danmarkimi radiokkut aallakaatitsisartussatut danskit illussaarsuarnut kultureqarnermullu aqutsisoqarfiannut aamma qinnuteqarnikuupput.
Taakku sapaatit akunnerannut 20,25 tiimit missaanni aallakaatitsisarnissartik naatsorsuutigalugu qinnuteqaamminni allapput. Tassa ukiuni pingasuni katillutik 3000 tiimit missaanni aallakaatitsisarnissartik naatsorsuutigigitsik allapput.
7 millionit koruunit Danmarkimi 2022-mut aningaasanut inatsisissamit Grønlandspuljenimut illikartinneqassasut, Folketingimi amerlanerussuteqartut akuersipput.
Aningaasat taakku kalaallisut Danmarkimi radiokkut aallakaatitsinermut atorneqassapput.
Aningaasat taakku ukiuni pingasuni, 2022-mi novembarimiit 2025-p tungaanut agguarlugit atugassatut Grønlandspuljenimut illikartinneqarput.
- Kalaallit naalaartartut oqaloqatigisakka kalaallisut Danmarkimi radiokkut ulluinnarni akunnialuinnarni tusarnaartalertussanngornerat ajuusaarutigaara, taanna KNR-imut oqarpoq.
Radio Inuna isornartorsiunngikkini, John Præstegaard erseqqissaavoq. Danskilli illussaarsuarnut kultureqarnermullu aqutsisoqarfiata Radio Inunamik aallakaatitassiortartussanngortitsigani radiokkut aallakaatitsinermut sivikinnerpaaffiliinissamik pingaartitsinerusimanngimmat, taassuma tupigusuutigaa.
- Aallakaatitsisoqartassaaq, tamannalu ajunngilluinnarpoq. Aallakaatitsisarnissalli sivikiginaannaqaat, John Præstegaard oqarpoq.
Aallakaatitsinernik sivikinnerpaaffiliisimanngitsoq
Qinnuteqartunut tusarnaagassiornermullu piumasaqaatit:
- Nipitigut immiussat tamarmik Danmark tamakkerlugu pissarsiarineqarsinnaassapput akeqassanatillu
- Radiop imarisassaanik nalunaajaaneq
- Aallakaatitat tamarmik kalaallisut oqaasertaqassapput
- Aallakaatitassiat annerpaamik sisamararterutaat nipilersugaasinnaapput
- Aallakaatitassiat nutaarsiassanik, piffissami matumani sammineqartunik, aliikkutassianillu imaqassapput
- Aallakaatitassiani akornanniluunniit ussassaaruteqartoqassanngilaq
- Aaqqissuussinermut teknikkikkullu aningaasartuutissanik missingersuuteqarneq
- Danmarkimi kalaallit avatangiisiinut atassuteqarnermut nalunaajaat
Tamatuma saniatigut Slots- og Kulturstyrelsenip qinnuteqartut suliatigut, piginnaasatigut, misilittakkatigut oqaatsitigullu piginnaasat ilaalu ilanngullugit pingaartippai.
“Grønlandspuljen”-imi 2022-mit 2025-mut tusarnaagassiornissamut aningaasat katillugit 7 millionit koruuniupput.
Tusarfik: "Kalaallisut oqaasertaqartumik tusarnaagassiornissamut tapiissuteqarnissamut aningaasaliissutit", "Pulje til støtte af grønlandsksproget programproduktion på lyd", Slots- og Kulturstyrelsen
Qinnuteqartut aallakaatitassiarerusutaasa sivisussusissaannik danskit illussaarsuarnut kultureqarnermullu aqutsisoqarfiat aallakaatitassiortussarsiornermini sivikinnerpaafffiliisimanngilaq.
Qinnuteqartulli ilaatigut Danmarkimi kalaallit avatangiisiinut qanoq atassuteqartiginerminnik ilisimasaqartiginerminnillu paasissutisseeqquneqarput.
Qanorli sivisutigisumik qanorlu akulikitsigisumik aallakaatitsisarnissartik naatsorsuutigineritsik, qinnuteqartuni katillutik arfineq-pingasuusuni tallimat qinnuteqaamminni allappaat.
Taakkunannga tallimaasuni pingsut Radio Inunap aallakaatitsisarnissaanit sivisunerusumik aallakaatitsisalersaarsimasut qinnuteqaataanni erserpoq.
Radio Inunamik suliniummi aqutsisoq, Arnannguaq Gerstrøm, attavigaarput.
Radio Inunali suut pillugit qanorlu sivisutigisumik aallakaatitsisarniarnersoq, taassuma oqaatigerusunngikkallarpaa.
Aallakaatitassiortartussanngortitaanertilli pingaartillugulu qujamasuutigigitsik, taanna oqarpoq, aallakaatitassiortussanngortitaanerannullu oqaaseqartitsiniarutta danskit illussaarsuarnut kultureqarnermullu aqutsisoqarfiannut saaffiginneqqulluta.
Siumut: Qanoq sivisutigisumik aallakaatitsisassanera apeqqutaanani aallakaatitttagassaatali imarisaat apeqqutaasut
Aallakaatitsisussarsiornerminni sooq sivikinnerpaaffiliisimannginnersut, danskit illussaarsuarnut kulureqarnermullu aqutsisoqarfiat apeqqutigaarput.
Aqutsisoqarfiup apeqquterput erseqqissumik akinngilaa. Qinnuteqartunulli piumasaqaatit partiinit aningaasanik Danmarkimi 2022-mut aningaasanut inatsissamit tusarnaagassiornermut atugassanik Atlantikup Avannaamiunut aningaasaliissutinut illikartitsinissamik akuersisunit akuerineqarsimasut erseqqissaatigaa.
AAMMA ATUARUK Holstebromi isiginnaartitsisarfik Danmarkimi kalaallisut oqaasertaqartumik radiokkut aallakaatitsisalissasoq
Folketingimi ilaasortaq Siumumeersoq, Aki-Matilda Høegh-Dam, Radio Inunap aallakaatitsisalernissaanut sivikinnerpaaffiliisoqarsimannginneranut oqaaseqarumanngilaq.
- Qanoq sivisutigisumik qanorlu akulikitsigisumik aallakaatitsisassanera immaqa eqqartuinnarnagu aallakaatittagassaata imarisaasa suuneri apeqqutaatittariaqarput. Imaanngilarmi nalunaaquttap akunnerini qulini aallakaatitsinissaq piumasaqaataammat, taakku pinngitsoornatik akunnernik qulinik sivisussuseqassasut.
Imali nangippoq:
- Aallakaatitaat sumut tunngasuunersut naalaarlugit soorunami malinnaaffigissavagut. Qanorlu sivisutigisassanersut sumullu tunngasuusassanersut taavalu aningaasaliissutitsinnik qanoq atorluaatigissanersut pissangatigeqaarput. Aki-Matilda Høegh-Dam oqarpoq.
IA-p Danmarkimi 2022-mut aningaasanut inatsisissaq akuersissutigaa. Folketingimili ilaasortaq IA-meersoq, Aaja Chemnitz, tamatumunnga tunngatillugu oqaaseqartikkusukkaluaratsigu iluatsinngilarput.
