Qinnuteqartunit isornartorsiuineq: Danmarkimi kalaallisut radioqalernissaanut piumasaqaatit ersarinngitsut
Holstrebromi isiginnaartitsisarfimmit, Nordisk Teaterlaboratoriumimit Radio INUNA Danmarkimi kalaallinut kalaallisullu tusarnaartartunut tusarnaagassiaq siulleq februaarimi saqqummissaaq.
Isiginnaartitsisarfiup Danmarkimi kalaallinut innuttaasunut 2022-mit 2025-mut tusarnaagassiaqartarnissamut suliariumannittussarsiuussineq siorna oktobarimi ajugaaffigaa. Qinnuteqartut arfineq-marluk akornannit taanna toqqarneqartoq, Slots og Kulturstyrelsemit KNR-ip allagaatinik takunniffigisinnaasaata takutippaa.
AAMMA ATUARUK Holstebromi isiginnaartitsisarfik Danmarkimi kalaallisut oqaasertaqartumik radiokkut aallakaatitsisalissasoq
Slots- og Kulturstyrelsemiilli suliariumannittussarsiuussineq ersarinnginnerarlugu maanna isornartorsiorneqarpoq. Suliariumannittuuniartut itigartitaasut marluk taama isumaqarput.
Seismomi aaqqissuisuuneq, John Præstegaard ilagaat. Taassuma Danmarkimi Kalaallit Illuutaat kalaallillu tusagassiortut arlallit suleqatigalugit sapaatip akunneranut sivikinnerpaamik akunnerit 20-t kalaallisut tusarnaagassiortarniaraluarpoq.
Tusagassiorfiup qinnuteqannginnermini kalaallit Danmarkimiittut arlallit toqqaasinnaagaluarunik sunik tusarnaagaqarusussagaluarnersut apersoqqaarsimavai.
Qinnuteqartunut tusarnaagassiornermullu piumasaqaatit:
- Nipitigut immiussat tamarmik Danmark tamakkerlugu pissarsiarineqarsinnaassapput akeqassanatillu
- Radiop imarisassaanik nalunaajaaneq
- Aallakaatitat tamarmik kalaallisut oqaasertaqassapput
- Aallakaatitassiat annerpaamik sisamararterutaat nipilersugaasinnaapput
- Aallakaatitassiat nutaarsiassanik, piffissami matumani sammineqartunik, aliikkutassianillu imaqassapput
- Aallakaatitassiani akornanniluunniit ussassaaruteqartoqassanngilaq
- Aaqqissuussinermut teknikkikkullu aningaasartuutissanik missingersuuteqarneq
- Danmarkimi kalaallit avatangiisiinut atassuteqarnermut nalunaajaat
Tamatuma saniatigut Slots- og Kulturstyrelsenip qinnuteqartut suliatigut, piginnaasatigut, misilittakkatigut oqaatsitigullu piginnaasat ilaalu ilanngullugit pingaartippai.
“Grønlandspuljen”-imi 2022-mit 2025-mut tusarnaagassiornissamut aningaasat katillugit 7 millionit koruuniupput.
Paasissutissarsiffik: Kalaallisut oqaasertaqartumik tusarnaagassiornissamut tapiissuteqarnissamut aningaasaliissutit, "Pulje til støtte af grønlandsksproget programproduktion på lyd" Slots- og Kulturstyrelsen
- Tamarmik ilaasalu ulloq naangajallugu KNR tusarnaartaraat tusaasinnaavara. Taakkununngali pigitinneqartumik tapersiisinnaanermullu periarfissaqartitsiviusoqarnissaa sutigut tamatigut soqutigineqartorujussuuvoq, John Præstegaard oqarpoq.
Seiosmomit eqimattap radiomik qanoq imaqartumik naatsorsuuteqartoqarnersoq Slots- og Kulturstyrelse arlaleriarluni tusarniaaffigaa.
Suliariumannittussarsiuussinermi assersuutigalugu ukiuni pingasuni akunnerit qassit annerpaamik suliarineqassanersut nalunaarsorsimanngilaq.
Aamma imarisai assigiinngitsut soorlu nutaarsiassat, oqallinnerit aliikkutassallu akornanni qanoq agguataarisoqassanersoq nalunaarsorsimanngilaq. Taamaallaalli piffissap sisamararterutaannaa nipilersukkanik immersorneqarsinnaassasoq piumasaqaataavoq.
Seismoli eqimattarlu tassanngaanneersoq suliarinninnissamut itigartinneqarpoq. Tamannalu aaqqissuisuunerup tupaallaatigaa.
- Eqqarsarpunga: Uggornaq aamma suliassamut qinnuteqarnissamut misissueqqaangaatsiarnerput naammanngitsoq tupigusuutigaara.
John Præstegaard itigartitsisoqarnerata kingorna aalajangiinermi allagaatinik takunnikkumavoq. Tamannali pillugu ilisimasaqarnerulinngilaq.
- Tusagassiortut aqqitigut taagorneqartut imassaanillu pilersitsisussat qinnuteqarnissatsinnut atatillugu oqaloqatigisimasagut atorlugit ukiuni pingasuni akunnerit 3000-it radiokkut tusarnaagassiorniarnerput naammanngilaq. Tamatuma aalajangiisuunnginnera tupaallaatigingaatsiarparput.
John Præstegaardip suliariumannittussarsiuussisoqarnerani toqqarneqartoq Radio INUNA isornartorsiorneqanngitsoq Slots- Kulturstyrelseli isornartorsiorneqartoq erseqqissaatigaa.
Qinnuteqartoq: Piumasaqaatit siammasingaatsiartut
Tusagassiorniartut allat tassa AR2022 – avalannerit raadiuata suliariumannittussarsiuussineq aamma isornartorsiorpaa, taakkulu itigartitsineq Slots- og Kulturstyrelsemut maalaarutiginiarpaat.
Tassani Paornanguak H. Kleist, Jokum Nielsen aamma Bikki Reimer tusagassiortuupput. Paornanguak H. Kleistillu oqarnera naapertorlugu Slots- og Kulturstyrelsenimit qinnuteqarnissamut piumasaqaatit ersarinngippallaarujussuarput.
Danmarkimi kalaallisut oqaaseqartumik tusarnaagassiornissamut qinnuteqartut:
- Radio INUNA, Holstrebromi Nordisk Teaterlaboratoriumimit tusarnaagassiorneq, tassani Arnannguaq Gerstrøm nunatsinni isiginnaartitsisarfik ilaatigut suleqatigalugu suliniummi aqutsisuuvoq
- Tusarnaagassiaq “Nipigut” nutaarsiassaqartitsivik Seismo tusarnaagassiortoralugu Danmarkimi Kalaallit Illuutaat suleqatigalugit tusagassiortorlu Inga Hansen aaqqissuisoralugu
- "Ånder på isen" Mads Petter Kühnel tusarnaagassiortoralugu – kalaallit oqaluttuaataannik unikkartuinillu nangeqattaartartuliorneq
- "Radio Inuit" tuagassiortoq Karsten O. A. Heimann suliuniummi aqutsisoralugu
- Aarhus Global Media (AAGM) (aallakaatitassap aqqa ilisimaneqanngilaq) Rui Monteiro suliniummi aqutsisutut siuttoralugu aamma Aarhusimi Kalaallit Illuutaat kiisalu AVALAK suleqatigalugit
- “AR2022 – avalannertit raadiuat” tusagassiortoq Jokum Nielsen suliniummi aqutsisoralugu
- “Danmarkimi kalaallit aalajangersimasut pillugit tusarnaagassiat” Dennis R. Ingemannimit suliarineqartut
Paasissutissarsiffik: Danmarkimi Slots- og Kulturstyrelsemi “Grønlænderpuljen”-imut qinnuteqartunik takunnissinnaatitaaneq.
- Radiop Danmarkimi kalaallinut attuumassuteqarnissaa kisiat anguniagassaraarput. Tamannalu assigiinngitsorparujussuit atorlugit naammassineqarsinnaasutut siammasissorujussuarmik piumasaqaateqarneruvoq, taanna oqarpoq.
Suliariumannittussarsiuussinermi “kalaallinut Danmarkimi najugaqartunut “tusarnaarnikkut kateriffimmik pilersitsinissaq” anguniagaasoq aamma aqutsisoqarfiup “aallakaatitassat imarisassaanut piumasaqaatinut naapertuunnersut” pingaartissagai allassimavoq.
Aqutsisoqarfiup “qinnuteqartut suliamut, piginnaasatigut, misilittakkatigut, oqaatsitigut allatigullu naleqqunneri” misissussagai qinnuteqartullu tusarnaagassiornermi missingersuuteqassallutik.
Tamatuma saniatigut qinnuteqartunit imarisassaanut atatillugu siunnersuuteqartoqassaaq.
Paornanguak H. Kleistilli oqarnera naapertorlugu itigartinneqarnerminni qinnuteqartoq alla piumasaqaatinut naapertuunnerusoq allassimavoq.
- Kisianni taama aalajangersimanngitsigitillugit piumasaqaatigineqartut naammassiniarnerat ajornarpoq, taanna oqarpoq.
Paornanguak H. Kleistip qinnuteqartut allat takusimanagit erseqqissaatigaa. Taakkulu maalaaruteqarnertik aalajangiinermut allannguinissaa naatsorsuutiginngilaat.
KNR-ip isornartorsiuineq pillugu Slots- og Kulturstyrelsemit oqaaseqartoqarsiivaa.
