Holstebromi isiginnaartitsisarfik Danmarkimi kalaallisut oqaasertaqartumik radiokkut aallakaatitsisalissasoq
Kalaallisut oqaasertaqartumik Danmarkimi aallakaatitsisarfimmik pilersitsinissamut 7 millionit koruuninik aningaasaliisoqarpoq. Aningaasat Holstebromi Nordisk Teaterlaboratoriumimut tunniunneqarpoq, tassanngalu ukiuni tulliuttuni pingasuni sapaatip akunneranut ataasiarluni kalaallisut oqaasertaqartumik aallakaatitassiortoqartassaaq.
- Podcast nutaaq INUNA Radio kalaallit Danmarkimi najugaqartut tusarnaartarfittut ataatsimoortarfissaraat, tassani Danmarkimi najugallit, kinguaariiaat illoqarfiillu akornanni ilisimasaminnik misigisartakkaminnillu avitseqatigiittarnissaminnik periarfissaqassapput, aallarniisoq aamma isiginnaartitsiviup pisortaa Per Kap Bech Jensen nassuiaavoq.
Aningaasat danskit partiivisa aningaasanut inatsimmut 2022-muit immikkoortitaraat, aningaasallu ilarpassui Kalaallit Nunaata Danmarkillu akornanni atassuteqarnermut iluaqutaassapput.
- Siumumi siunertamut aningaasanik immikkoortitsisimavugut, kalaallit aaqqissuussaannik radioprogramminik aallakaatitassiortoqarnissaannik pisariaqartitsisoqarmat. Politikkikkut uagut radiomi aallakaatitsisarfiliornissaq qanoq isikkoqarsinnaanersoq pillugu sinaakkusiisimavugut, Slots-og Kulturstyrelsenilli kia aallakaatitassiorneq suliarissaneraa naliiffigisimavaa aaqqissuullugulu.
- Aallakaatitassiat tusarnaarnissaannut assut qilanaarpunga, oqarpoq kalaaleq Folketingimi ilaasortaq, Aki-Matilda Høegh-Dam.
Kalaaleq erinniortoq aqutsisuussasoq
Kalaalleq erinniortoq inuussutissarsiornermillu ingerlatsisoq, Arnannguaq Gerstrøm Nordisk Teaterlaboratoriumimi sulisuuvoq, taannalu suliniummik aqutsisuussaaq.
Per Kap Bech Jensenillu suliniummit kalaallit Danmarkimi najugaqartut qanoq akuutinniarneqassanerannut nassuiaanermini Arnannguaq Gerstrøm aamma eqqaamaa.
- Suliniummi aqutsisoq Arnannguaq aamma kalaaliuvoq, Kalaallit Illuutaannut aamma attaveqarluarpugut, taakkulu ilaatinnissaat eqqarsaatigaarput, kiisalu Kalaallit Nunaanni Isiginnaartitsisarfik qanimut suleqatigilluartarlutigu, Per Kap Bech Jensen KNR-imut oqarpoq.
Nunatta Isiginnaartitsisarfiani pisortap, Susanne Andreasenip radiokkut aallakaatinneqartalertussamut INUNA Radiomut suleqataanissani qilanaaraa.
- Oqaluttuat pitsaasut, imaluunniit sapernartut imaluunniit nuannersut oqaluttuarisarnerisa immitsinnut ungasissorsuugaluartugut qanillisittarpaatigut. Assut nuannerpoq kaalallit kalaaleqataannut akunnermiuliutsittassagatsigit, tamaalilluni oqaloqatigiinnerit itinerulerlutillu allaanerussammata. Ilaanni Kalaallit Nunaat pillugu Danmarkimi imaluunniit Danmarkimut paasisitsiniaanerit eqqartoraangatsigit, taava paasisitsiniaaqqaarluta imaluunniit kulturimik ’nutsereqqaarluta’ aallarteqqaartariaqartarpugut, uanili taamaaliussanngilagut, Susanne Andreasen oqarpoq.
Suliniutip takorloornera
- Kalaallit Danmarkimiittut digitalikkut kateriffeqarnissaat takorluugaavoq, tassa kalaallisut aallakaatitassiamik tusarnaarsinnaatillugit, Per Kap Bech Jensen suliniutigisartik pillugu oqarpoq.
- Uagut tusaaneqarneq ajortut tusaaneqarnissaannik periarfissiisuaannartarsimavugut, tassalu INUNA Radiomi tusaaneqarsinnaalertissaagut. Internettimi katersuuffiussaaq, Kalaallillu Nunaata Danmarkillu akornanni ikaartarfiussalluni. Aallartinnissaa qilanaaraarput, isiginnaartitsisarfiup pisortaa Per Kap Bech Jensen oqarpoq.
Tusarnaagassiaq ullutsinni pisunik, nutaarsiassanik aliikkutassianillu imaqartassaaq. Tusarnaartartut inoqutinut attaveqaatit assigiinngitsut aqqutigalugit paasititsiniaasoqartassaaq, kiisalu pisuni assigiinngitsuni peqataasoqartassalluni, isiginnaartitsisarfik tusagassiuutinut nalunaarummi allappoq.
Podcast nutaaq INUNA Radio 2023-mi februaarimi siullerpaamik aallakaatinneqassaaq, tamatumalu kingorna sapaatip akunnikkaartumik aallakaatitsisoqartassalluni.
