Isornartorsiuineq ilaasortaajunnaarniarnerunngilaq
![](/sites/default/files/styles/image_934x467/public/article_images/pukkelhval_foto_jan_nielsen.jpg?itok=eJrJE4_G)
- Arfanniarneq pillugu ataatsimiiiititaliarsumi ilaasortat ilaat sumilluuniit piniarnermut attuumassuteqanngitsut misigissutsit kisiisa tunngavigalugit aalajangiiniartarput taannalu uagut illuatungilerusupparput, Naalakkersuisut siullittaasuat Kuupik V.Kleist oqarpoq.
- Uumassusilinnik inuuniuteqarneq toqqammaveqassaaq, ilisimatuussutsikkut misissuinernit siunnersuinernillu aammalu siunissami qulakkiikkamik nungusaataanngitsumik toqqammaviit aallaavigalugit, Naalakkersuisut siulittaasuat oqarpoq.
IWCp nunarsuarmi arfattassat aalajangersartarpai pingaarnerpaatullu tunngavigineqartut Kalaallit Nunaata toqqammmavigalugit arfattassai aalajangerneqartut Naalakkersuisut siulittaasuat oqarpoq.
Naalakkersuisut neriuutigaat IWC nunarsuarmi affattassanik agguaaniarnernimi toqqammaviit aallaavigalugit siunissami sulissasoq, taamaanngippat apeqquserneqassaaq arfanniarnermut ataatsimiititaliarsuaq sumut atorneqassanersoq aamma iluaqutaanersoq.
Kalaallit Nunaata nammineerluni arfattasssanik aalajangiinera IWC-mit ilaasortaajunnaarnissamik kinguneqarnavianngitsoq Kuupik Kleist-ip oqaatigaa.
- Ilaasortaaginnarnissamik siunnerfeqarpugut. Toqqammaviilli tamanit akuerineqarsinnaasut toqqammavigalugit taamatut aalajangertariaqarneq tikissimavarput, Naalakkersuisut siullittaasuat oqarpoq.
Copenhagen Business School-imi cand. polit. aamma Nunarput pillugu ilisimasaqarluartoq, Lise Lyck oqarpoq, Kalaallit Nunaata arfattassanik IWC avaqqullugu pisassiinera Kalaallit Nunanata nunanik tamalaanik suleqateqarneranik akorsiisinnaasoq.
Tamakkiisumik qanoq kinguneqarumaarnersoq Kuupik V. Kleistip oqaatigisinnaannginerarpaa, taamaattorli Naalakkersuisut misigisimapput eqqortumik iliorlutik toqqammavissarititaasullu naapertorlugit iliuuseqarlutik.
- Nunarsuarmiunut oqaatigisariaqarparput uumassusilinnik inuuniuteqartuugatta, taavalu toqqammaviit, tassalu piujuaannartitsinissaq aamma kinguaassatta tamakkuninnga inuussuteqarsinnaanerat qulakkeerneqartariaqartoq aamma nunarsuarmioqatigiinnik suleqateqarnissarput soqutigigipput, Naalakkersuisut siulittaasuat nunat tamalaat suleqatigiiffiannik suleqateqarnerup akornuserneqarumaarnissamik oqarneq pillugu akissuteqarluni taamatut oqarpoq.
Naalakkersuisut danskit naalakkersuisui peqatigalugit arfanniarneq pillugu ataatsimiititaliarsuarmut IWC-mut allagaqarniarput, nunatta arfattassaminik ukiormanna qulinik ilasinera nalunaarutigalugu.