Isornartorsiorneqaraluarluni: Kielsen qinersititsinianngilaq
Nunatsinni politikkikkut sapaatit akunneranni uani pisoqangaatsiarpoq. Atassut naalakkersuisoqatigiinnit tunuarpoq, katillugillu naalakkersuisut pingasut marlunngormat tunuarput.
Naalakkersuisunullu ilaasortat nutaat marluk pingasunngornermi ullaap tungaani toqqarneqarput, taamaattorli illuatungiliuttut isornartorsiuipput: Naalakkersuisoqatigiinni Kim Kielsenip siorna qinersinerup kingorna pilersaatani ilaasortanit qulingiluaasunit pingasuinnaat suli atapput. Kim Kielsenili qinersititsinianngilaq.
Paasissutissat
- Aqqalu Jerimiassen (Atassut) Inuussutissarsiornermut Nukissiuuteqarnermullu naalakkersuisuugaluarpoq.
- Inuussutissarsiornermut Nukissiuuteqarnermullu naalakkersuisoqarfik ineqarnermut attaveqaqatigiinnermullu naalakkersuisup Karl Frederik Danielsenip (S) akisussaaffigigallassavaa.
- Siverth K. Heilmann (Atassut) Pinngortitamut, Avatangiisinut Ilisimatusarnermullu naalakkersuisuugaluarpoq. Naalakkersuisut siulittaasuata Kim Kielsenip avatangiisinut ilisimatusarnermullu naalakkersuisoqarfiit akisussaaffigigallassavai.
- Nikkulaat Jeremiassen (S) aalisarnermut, piniarnermut nunalerinermullu naalakkersuisuugaluarpoq. Aatsitassanut suliffeqarnermullu naalakkersuisup Erik Jensenip (S) naalakkersuisoqarfik akisussaaffigigallassavaa.
AAMMA ATUARUK Kielsen udpeger to nye naalakkersuisoq
- Puullaaqinartorujussuuvoq. Aamma politikkimi paatsiveerusimaarneq assut annertooq malunnarpoq inersuarmi, Partii Naleqqami siulittaasoq Hans Enoksen oqarpoq.
Suleqatigiissitsisut isumaqarput aalassassimaartoqarnera Kielsenip ikinnerussuteqarluni naalakkersuisoqatigiivisa matoqqavallaartumik ingerlatsinerannik pissuteqartoq.
- Peqataatitsinngikkaanni, naalakkersuinikkullu ammasumik ingerlatsinngikkaanni, ajornartorsiuterujussuanngorsinnaaneranut ersersitsilluartoq isumaqarpunga, Suleqatigiissitsisuni siulittaasup tullia Tillie Martinussen oqarpoq.
Tusiapittoqarneraraat
Inuit Ataqatigiit aamma naammagisimaarinninngillat.
- Naalakkersuinikkut suliaqarneq unittuuseqqavoq, tusiapittorujussuuvugut taarseraanneq taama annertutigisumik ingerlammat, Inuit Ataqatigiit siulittaasuat Muté Bourup Egede oqarpoq.
Isornartorsiusoqarnerali Kim Kielsenip tupaallaatiginngilaa.
AAMMA ATUARUK Kielsen Atassutip tunuarnera pillugu: Allatut ajornaqaaq
- Tupinnanngilaq illuatungiliuttut taamatut oqariartuuteqassagunik, Kim Kielsen oqarpoq.
- Qinersineq suaarutigineqanngilaq. Naalakkersuisoqatigiit ingerlaqqissaapput partii tapertaralugu Demokraatit.
Naalakkersuisoqatigiit maanna tassaalerput Siumut, Inatsisartunut qulinik ilaasortaqartoq, Nunatta Qitornai ataatsimik ilaasortaqartut, partiilu tapertaasoq Demokraatit arfinilinnik ilaasortaqartoq.
Naalakkersuisoqatigiit partiilu tapertaat taamaalillutik Inatsisartuni 31-nik ilaasortaqartuni 17-inik amerlanerussuteqarput.