Islandip præsidentia ataqqinaammik nersornaaserneqartoq

Nunat avannarliit killiit siunnersuisooqatigiivisa ataqqinaammik nersornaasiuttagaat siulleq Islandip præsidentianut Ólafur Ragnar Grímssonimut tunniunneqarpoq.

Tamannalu Nunat avannarliit killiit siunnersuisooqatigiivisa ukiunik 30-nngortorsiornerata Savalimmiuni Runavikimi kulturikkut illorsuarmi Løkshøllimi nalliuttorsiutigineqarneranut atatillugu pivoq.

Siunnersuisooqatigiit taamatut nersornaasiisalernikkut inuit Siunnersuisooqatigiit ineriartortinneqarnissaannut immikkut ittumik suliniuteqartut aammalu siunertaanik ilungersuuteqartut nersorusuppai. Ólafur Ragnar Grímssonillu ukiormanna toqqarneranut tamakku aamma tunngavilersuutigineqarput.

- Islandip præsidentiatut sulininni aammalu nammineq soqutigisatit tunngavigalugit ukiuni kingullerni arlalinni nunat siuttuinik, naalakkersuisunik nunani tamalaani suliffeqarfinneersunik ilisimatuunillu naapitaqartarninni aammalu isummersoqatigiiffinni Issittumik sammisaqarfiusuni Nunat avannarliit killiit ilannngunniartuartarpatit, Nunat avannarliit killiit siunnersuisooqatigiivini siulittaasoq Bill Justinussen nersornaammik tunniussinermi oqalugiaateqarluni taama oqarpoq.

AAMMA ATUARUK Nunat avannarliit killiit siunnersuisooqatigiivi ukiunik 30-nngortorsiorput

 
Ataqqinaammik nersornaat saqqarmiuuvoq kuultiusoq, avaleraasartuutut iluseqarluni

Ólafur Ragnar Grimsson ataatsimeersuarnermik Arctic Circlemik pingajussaanik ingerlanneqarluni ukiormanna kingusinnerusukkut pisussamik aallarneeqataasut ilagaat.

- Qamannga pisumik qujarusuppunga, aammali ataqqinaammik nersornaasigaanerup akisussaaffimmik nassataqarnera eqqaamassavara. Naalagaaffiit akornanni politikkikkut inissisimanerput nutaanngorsimavoq iliuutsillu malunnaatillit nalaattarpagut. Ataatsimeersuarnermi Arctic Circlemi nunat 40-t peqataassapput, taakkulu ilagaat Kina aamma Tyskland, taamaammat nunarsuup sinneranit soqutigineqarnerput malugisinnaavarput. Silarsuarmut nutaamut peqataanerput takutissavarput, Ólafur Ragnar Grimsson taama oqarpoq.  

- Avaleraasartooq ukiuni makkunani sammineqartupilussuaq Nunat avannarliit killiit siunnersuisooqatigiivini nunat pingasuulluta suleqatigiinnitsinnut ilisarnaataavoq. Suleqatigiinnermimi isumaqatigiissagaanni tamanna suliniuteqarnermik annertuumik aammalu piumassuseqarluarnissamik tamanna pisariaqartitsivoq, Bill Justinussen taama oqarpoq.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat