Nunat avannarliit killiit siunnersuisooqatigiivi ukiunik 30-nngortorsiorput
Siunnersuisooqatigiit ukiumoortumik 31-ssaannik ataatsimiinnerannut ullumi aallartittumut atatillugu nalliuttorsiorneq Savalimmiuni ingerlanneqassaaq.
Nunat avannarliit killiit siunnersuisooqatigiivi tassaapput Islandimi, Savalimmiuni Nunatsinnilu inatsisartut suleqatigiiffiat. Siunnersuisooqatigiit ukiumut ataasiarlutik ataatsimiittarput, avatangiisit, kulturi, ilinniartitaaneq, peqqinnissaq assartuussineq soqutigisallu allat ataatsimoorfigineqartut suleqatigiissutigineqarnerisa nukittorsarnissaat siunertaralugu.
Siunnersuisooqatigiit aamma nunat avannarliit killiit nunani allani ilisimaneqarnerulernissaannik suliaqarfiupput.
Siullerpaamik ataqqinaammik nersornaasiisoqassaaq
Nunat avannarliit killiit siuttui, Nunatsinneersoq Kim Kielsen ilanngullugu, ukiormanna nalliuttorsiornertalimmik ataatsimiinnissamut peqataaniarlutik nalunaarsimapput. Islandip præsidentia Ólafur Ragnar Grímsson aamma peqataassaaq, unnugulu kulturikkut aliikkusersuisoqarnerani Nunatsinneersoq Varna Nielsen bluesimik nipilersorlunilu tivasoq aliikkusersuisut ilagissavaat.
Aammattaaq Siunnersuisooqatigiit oqaluttuarisaaneranni siullerpaamik Nunat avannarliit killiit siunnersuisooqatigiivisa ataqqinaammik nersornaasiuttagaannik tunniussisoqartussaavoq. Taannalu kimut tunniunneqassanersoq unnugu nalunaarutigineqassaaq.