Islandimut peqqissariartut amerlanerulersikkusukkaat
Petrine Joelsenip, Islandimi napparsimmavimmiissimasup, uninnganermini sullinneqarluarsimanini qujamasuutigeqaa.
Petrine Joelsen qaammatit pingasut siusinaarluni 2016-imi nallisitsivoq.
Niaqornaarsummiit Nuummut Dronning Ingridiup Napparsimmavissualiaanneqarpoq naartualu annaanniarlugu pilattaanikkut ernisinneqarpoq.
AAMMA ATUARUK Naalakkersuisup innuttaasut akisussaassusermik takutitseqqugai
Erneratali inuunera navianartorsiorpoq, inunngujaarpallaaramimi sanngiippoq namminerlu anersaartorsinnaanani.
Taamaammat Dronning Ingridiup Napparsimmavissuaneersut aalajangerput nukappiaraq arnaalu piaartumik Islandiliaanneqassasut.
- Unnulersoq ilisimatippaannga ullaakkut Islandiliartariaqartugut nuunuutiga sanngiippallaarmat taavalu Islandimi inortulerisut pikkorissorsuummata aniguissappallu pitsaanerpaanit sullinneqartariaqartoq, Petrine Joelsen, erninilu qaammatit pingasut Islandimiissimasut, oqarpoq.
Ernera marluliisussaq maanna peqqeqaaq. Islandimilu periarfissagissaartinneqarsimanini qujamasuutigeqaa.
- Ilaatigut allaat tarnip pissusaanik ilisimasalinnik oqaloqateqarnissannik neqerooruteqarlutik. Pisariaqaraangat nutserisoqarpoq, piaartumik ikiuigasuartarput tusarnaallaqqillutillu. Ikiuukkumatoorujussuupput.
Napparsimasut nunatsinni peqqissarneqarsinnaanngitsut ukiumut 1000-t missaanniittut Danmarkiliaanneqartarput.
Peqqissariartut amerliartornerisigut Kalaallit Peqqissartut Illuat Danmarkimiittoq inissaaleqiffiusalerpoq. Tamannalu aaqqiissuteqarfiginiarlugu Naalakkersuisut amerlanerusunik Islandiliartitsisalerniarput.
Sermitsiaq.AG naapertorlugu kalaallit ukiumut 20-t Islandiliartinneqartarput. Naalakkersuisut isumaqarput siunissami qaninnerusumi amerlanerulersissinnaagitsik, tassami Island suleqatigiinnerunissamik aamma soqutiginnippoq:
AAMMA ATUARUK Nakorsiarnissamik SMS-ikkut eqqaasitsinerit takkuttartut amerlanerulersissagaat
- Islandimik suleqateqarnerput ullumikkumut pitsaasumik ingerlavoq. Aamma Islandimik suleqateqarnerput annertusaavigissallugu ukiuni kingullerni soqutiginikuuarput Naalakkersuisooqatigiillu isumaqatigiissutaanni tamanna anguniarparput, peqqissutsimut naalakkersuisoq Doris Jakobsen Jensen oqarpoq.
