Islandimut aqqut ammaqqippoq: Ajunaaruteqarpugut 2022-mulli isumalluarpugut
Islandimiit nunatsinnut timmisartukkut aqqut septembarip aallaqqaataani ammassaaq. Tamannalu Tasiilami takornarialerisut nuannaarutigeqaat. Coronami peqqutaalluni takornariaqannginnera 10 millionit koruunit tungaanut annaasaqaatigisimavaat.
- Qujanaqaaq ammartoq, neriukkaluaratta juunimili ammassasoq, kisianni siumut isigisariaqarpugut oqarluta, kingumut isigivallaarnata massakkut ammarnera akueralugu ingerlaqqissaagut, taamak sivisutigisumik utaqqinerput pivallaarnagu.
AAMMA ATUARUK Sisimiuni Upernavimmi Aasiannilu killilersuinerit oktobarimut sivitsorneqartut
Islandimiit nunatsinnut aqqutip ippassaq ammarnera pillugu, taama oqarpoq Tasiilami hotelimik qulimiguulimmillu piginnittoq Mike Nikolajsen.
Taakkumi covid-19-qalermalli aningaasanik annaasaqarsimaqaat.
10 mio. kr. missaat annaavaat
- Aningaasat 5-10 millioner koruunit missaat annaavagut, taakkulu aningaasat katatagut takkuteqqinnavianngillat. Matumani pivara katilluta, umiatsianik angallassisartut, tivasartut, sanalukkanik tuniniaasartut assigisaallu, taanna oqarpoq.
Mike Nikolajsen oqaluttuarpoq takornarianik iluanaaruteqartarsimagaluartut akornanni aningaasaanik amigaateqartoqarnera malunnarsimaqisoq. Tamatumalu kingunerisaanik illoqarfik piffissami tassani najorlugu nipaattaqisoq oqaluttuaraa.
- Sanalukkanik qiperuisartut annaasaqaqaat, tamaanimi takornariat assut sanaluttartunut iluaqusiisaraluaqigamik. Coronalli kingorna assorsuaq annaasaqaqaat,tamatumalu kingunerisaanik illoqarfik nipaattaqaaq.
AAMMA ATUARUK Kangiata avannaani qaarusunnut ilisimanngisannut paasisassarsiorlutik susoqarsinnaanissaanut ilisimasaqarneruniartut
Minnerunngitsumillu namminneq sulisutik aamma annaasaqarput.
- Takornarianik angallassisartut, erruisartut, inilerisut, umiatsianik aquttut. Tasiilamiinnaanngitsoq aamma Kulusumi taamaappoq, tassa imaappoq sulisorpassuit allatut ajornartumik sulinngillat.
Taama oqarpoq Tasiilami akunnittarfiutilik qulimiguuliutilillu Mike Nikojsen. Taassuma aamma qilanaarluni oqaluttuaraa ulluni qaninnerpaani takoriat tyskit tikissamaartut.
