Sisimiuni Upernavimmi Aasiannilu killilersuinerit oktobarimut sivitsorneqartut

Naalakkersuisut Sisimiuni Upernavimmi Aasiannilu killilersuinerit atuunnerat sivitsorpaat.

Taakku oktobarip ulluisa 31-ata tungaanut sivitsorneqarput.

Taakku pingasunngorpamit atorunnaartussaagaluarput.

Tamakkiisumik akiuussutissamik kapitissimanermut uppernarsaateqarnissaq piumasaqaataavoq.

Assartuutinut tamanit atorneqartunut ilaassaguit tamakkiisumik kapitissimanissat piumasaqaataavoq. Tamanna bussinut, timmisartunut, angallatinut attartortakkanut aamma Sarfaq Ittummut atuuppoq.

AAMMA ATUARUK Sisimiuni tunillatsittut nutaat arfineq-marluk - tallimanut tusagassiortunik katersortitsisoqassaaq

Sisimiuniit, Upernavimmiit Aasianniillu angalasut tamakkiissumik kapitissimanngitsut tamarmik nunatsinni sumiiffimmut allamut tikinnerminni sivikinnerpaamik ulluni tallimani angerlarsimaannassapput.

Katersuunnermut annertunerusunut, timersortarfinnut, neriniartarfinnut, imerniartarfinnut aamma sumiiffinnut tamanit orninneqarsinnaasunut tamanut, soorlu napparsimmavinnut, pisiniarfinnut, kommunit allaffiinut kiisalu assartuutinut tamanit atorneqarsinnaasunut isissaguit.

Sisimiuni, Upernavimmi Aasiannilu tamat orniguffigisinnaasaanni inuit 20-t sinnerlugit katersuuteqqusaanngillat.

Nunatsinnut angalasut nunatsinni najugaqanngitsut tamakiissumik akiuussuserneqarsimanissaat aamma piumasaqaataavoq.

Tamatuma saniatigut Naalakkersuisut Reykjavikkip Kulusuullu akornanni aqqut ammarpaat.

Reykjavikkip Kulusuullu akornanni timmisartumik sapaatip akunneranut pingasoriarluni tikittoqarsinnaalerpoq, ilaasullu amerlanerpaamik 180-iusinnaallutik.

Nunatta sinnerani killilersuinerit pingasunngorpamit atorunnaassapput.

Nuummi tunillatsissimasut nutaat tallimat ullumi paasineqarput.

Sisimiuni tunillatsissimasut arfineq-marluk ullumi paasineqarput.

- Sisimiuni tuniluuttoqarnerani ukkatarinninnissaq suli pisariaqarpoq. Tallimanngorpat akiuussusersuisoqalerpat kapitikkiartukaasoqarnissaa neriuutigaarput, nakorsaaneq, Henrik L. Hansen oqarpoq.

Taassuma Nuummi tunillatsissimasut tallimat aamma paasineqartut oqaatigaa.

- Tunillatsissimasumut qanillisimasuupput, tassa ilimageriikkatsinneerput. Tamannali unnugu paasilluassavarput, Henrik L. Hansen oqarpoq.

- Nuummi pissutsit Sisimiunilu pissutsit assigiinngillat. Tuniluuffiusuni ilisimakanneriikkatsinni tuniluuttoqartoq kisimi takuarput.

Nunatta kujataani tunillatsissimasut tamarmik maanna peqqisseqqissimapput.

- Nunatta kujataani tunillatsissimasoqarunnaarpoq. Tamanna nutaarsiassatsialaavoq, kisianni delta tuniluutsillugu tuniluuteqqilissanersoq naluarput. Sumiluunniit tunillatsissimasoqarnissaa piareersimaffigiuaannartariaqarparput.

• Avannaata Kommunia: Tunillatsissimasut katillugit 12-it.
• Kommune Qeqertalik: Tunillatsissimasut katillugit sisamat – ippassaq tallimaapput. 
• Qeqqata Kommunia: Tunillatsissimasut katillugit 60-it - ippassaq 53-iupput. 
• Kommuneqarfik Sermersooq: Tunillatsissimasut katillugit 16-t – ippassaq 13-iupput. 
• Kommune Kujalleq: 0 – Ippassaq pingasuupput.