Islandimiut suliffeqarfiat Sisimiuni qalulerivimmik ammaasoq

Isfell Sisimiut A/S umiarsuarnut aalisakkerivinnullu atortussanik allanillu tuniniaassaaq; kiisalu sulisartunut sanaartortunullu isumannaallisaatinik sullisinillu aamma tuniniaassalluni.

Suliffeqarfik nutaaq aalisariutaatilik Hanseeraq Enoksen suleqatigalugu pilersinneqarsimavoq, taassuma aalisariutaatillit Angunnguaq A/S ingerlatarereerpaa.

Sisimiut toqqarneqarsimapput illoqarfiup umiarsualiviginnera pissutigalugu, aammalu umiarsualivik ukioq kaajallallugu sikoqartanngimmat, suliffeqarfimmeersoq Magnus Eyolfsson tusagasiuutinut nalunaarummi allappoq.

Taassuma saniatigut Sisimiut umiarsualiviat tassaavoq aalisariuterpassuit tulaassivigisartagaat, soorlu aamma umiarsualivik nunani allamiunit Nunatta Canadallu imartaani aalisartunit tulaffigineqartartoq.

Suliffeqarfik taanna maanna nunani pingasuni immikkoortortaqalerpoq.

Suliffeqarfiup allaffeqarfia, qalorsualiorfiillu ingerlatai arfineq marluk Islandimiipput. Taakku saniatigut Newfoundlandimiittumi St. Johnsimi immikkotortaqarfeqarpoq, qalorsualiorfilimmik aalisarnermilu atortussanik aalisariutinut tuniniaavittalimmik.

Isfell Sisimiut A/S-ip neriuutigaa suliffeqarfiup Sisimiuniititaqalerneratigut aalisarnerup tungaatigut Nunatta Islandillu akornanni suleqatigiinneq suli annerulerumaartoq.