Islandimiusut oqaatsinut ullorititaq

- Islandimiusut oqaatsit ineriartortuarnissaannik eqqaasissutitut ullumi ulloq atussavarput, ilinniartitaanermut kultureqarnermullu ministeri Katrín Jakobsdóttir islandimiut aviisiannut Morgunblaðið-imut oqarpoq.

Oqaatsit nutaat ulluinnarni atortunut assigiinngitsunut taaguutigineqartut, soorlu iPadip isladimiusut taaguutaanut innuttaasut ilisimasaqarnerulernissaat kultureqarnermut ministerip ilanngullugu kaammattuutigaa.

- Islandimiut oqaasii inunnit ikittuinnarnit atorneqarput, taamaattumik oqaatsit ineriartortinneqassappata islandimiusut taaguutit assigiinngitsut, soorlu teknikkimut tunngassutillit, atorneqartuarnissaat pingaaruteqarpoq, Katrín Jakobsdóttir oqarpoq.

Nalliuttorsiornermut atatillugu aamma nersornaasiisoqassaaq, Jónas Hallgrímssonip nersornaataa, inummut islandimiut oqaasiinik atuilluartumut kultureqarnermut ministerimit ullumi immikkut nalliuttorsiornermi tunniunneqassalluni.

Islandimiusut oqaatsinut ullorititaq atuarfinni, pisortat suliffeqarfiini peqatigiiffinnilu nuna tamakkerlugu  malunnartinneqassaaq.