Islandimi aningasarsiorneq ajorseqqeriaannaavoq
Islandimi aningaasarsiornerup pitsanngoriartornera ukioq manna qaammatini pingasuni siullerni kisitsisit aningaasaqarnermut tunngasut takutikkaluaraat, taamaattoq akiligassarsuarnit sukkulluunniit ajornartorsiutaalersinnaasunit aalaterneqarsinnaavoq.
Islandimi eqqartuussiviit qullersaanni eqqartuussinermi - Norgemi aviisimi Aftenpostenimi allaaserineqartoq naapertorlugu - erseqqissarneqarpoq, nunat allat aningaasaannit taarsigassarsiat, aningaasarsiorneq ajorteruttormat biilinik illunillu pisinermut ilaatigut tunniunneqarsimasut, inatsisitigut unioqqutitsinerusut.
Eqqartuussinerup taassuma kinguneraa inuit amerlaqisut piisaartoqarnerata nalaani taarsigassarsisimasut, maanna taarsigassarsiarisimasatik Islandimiut aningaasaata nalinganik nalilersillugit, tassa nunat allamiut aningaasaasa nalingannik nalilersinnagit, utertillugit akilissammatigik.
Nunat allamiut aningaasaannik akiligassat taarsigassarsisunit aningaaserivimmut ingerlateqqillugit nassiunneqarsinnaapput.
Aftenpostenip allagaa naapertorlugu Islandimi aningaaseriviit 40 milliardit koruuninut nunat allamiut aningaasaannik taarsigassarsisitsisimapput - tassalu Islandimi nunap ukiumut pilersittagaasa affaasa missaanniittut.
Islandimi aningaasaqarnermut ministeri, Steingrimmur J. Sigfusson, missiliuussivoq, aningaaseriviit, eqqartuussinerup kingornagut, taarsigassarsiat allatut ajornavissappat 40 procentiniit 60 procentinut nalikillisariaqarsinnaagaat.
Taamatut pisoqarpat Islandimi naalagaaffiup aningaaserivissuit Kaupthing, Landsbanki aamma Blitnir annaanniaqqittariaqalissavai.
