Island isikkamik arsaalluni Europami pissartanngorniuteqataalersoq
Island Kasakhstanimut Reykjavikimi ippassaq unnukkut unammigami unammineq 0-0-imik inerneqarpoq. Tamanna pissutaalluni Island gruppimini minnerpaamik normu 2-tut inissittussanngorpoq, pissartanngorniunnissamullu anngunnissani qulakkeerlugu.
Islandip EM-imut anngunnera pissutaalluni Islandimi innuttaasut 330.000 missaanniittuni nuannattunnguaqarpoq.
Island anngunniunnernut ukiorpassuarni peqataasarnikuuvoq, aatsaallu tassa pissartanngorniunnissamut anngulluni. Islandimiut arsaattartut ukiuni kingullerni siuariartupiloorsimaqaat, inuusuttullu U-21-t anngunniunnernut aamma peqataasarnikuullutik.
Anngunnissartik sulissutigisimaqaat
Islandip siulersortia Aron Gunnarsson Kasakhstanimut ippassaq unamminerup naalernerani dommerimit anisitaavoq, taamaattorli Islandip oqaluttuarisaanermi siullerpaamik pissartanngorniutivinnissamut anngunnera nuannaarutigeqaa tulluusimaarutigalugulu:
- Tupinnaqaaq, tupaqqaqaanga. Anngunnissarpulli sulissutiginikooqaarput. Arsaattaleramali ilimagisimanngikkaluarpara tamaanga anngutissalluta, Aron Gunnarsson oqarpoq.