Island Gamesip naggataarnerani pingasunik medaljannattoqartoq
Nerrivimmi arsaararnerami angutit unammineranni Ivik Nielsen Guernseymeersumut, Garry Doddimut finalimut unammigami kuultinnappoq.
Nerrivimmilu arsaararnermi sungiusaasoq, Otto Zeeb ajugaasumut nersualaarinnippoq.
- Sakkortoorujussuarmik unammivoq. Sukkasoorujussuit pitsassuit unammisaraluarpai, kisianni eqqarsarluartarnermigut assorujussuaq unammillaqqippoq, sukkallunilu. Tupinnaannartumik saassutaritittaraluarluni suli sukkaninngorlugit ilaatigut saassuteqqittaramigit. Assorsuaq tulluusimaarnarpoq isiginnaarlugu, sungiusaasoq, Otto Zeeb taama oqarpoq.
AAMMA ATUARUK Nunarput Island Gamesimi siullermeertumik ujaminnattoq
Nerrivimmilu arsaararnermi arnani ilimaginngisamik sølvinnattoqarpoq.
Karliinannguaq Lundblad finalimut annguppoq sølvinnallunilu tamannalu nuannaarutigineqarpoq.
- Tulluusimaarnartorujorujussuuvoq, unammisartoq ilimagineqarpallaanngiivilluni Island Gamesimi normu 2-joriasaartoq. Assorsuaq tulluusimaarnarpoq, Otto Zeeb oqarpoq.
Nerrivimmi arsaararnermi iligiikkuutaarluni unammisoqarmat Aqqalu Nielsen aamma Ivik Nielsen sølvinnapput. Unammisullu kuultinnannissaat sungiusaasumit neriuutigineqaraluarluni unammisut sølvinnammata nuannaarutigineqarpoq.
- Aamma kingullermi Island Gamesimi 1-iunikuugamik. Taamaattumik aamma neriuutigisimavagut. Kisianni angusaat ajunngeqaat. Iluareqaagut, nuannaaqaagut, Otto Zeeb oqarpoq.
AAMMA ATUARUK Nunarput Island Gamesimi kuultinnattoq
Nunatsinnit unammisartut katillugit arfineq pingasunik medaljannapput. kuultit marluk, sølvit marluk kiisalu bronzit sisamat.