Island Gamesimi peqataasussat aallarput
Qeqertarmiut unammiuaarnissaannut ukiormanna Tuluit qeqertaanni Jersey-mi pisussamut peqataasussat tamarmik ullumikkut aallartussaapput, arfininngorpallu aallartikkunik sapaatip akunnerani ataatsimi unammisaqattaassallutik.
Kalaallit Nunaat timersuutini ukunani unammeqataatitaqassaaq: Nerrivimmi arsaararneq, arsaanneq, sulorarneq, triatlon, tassa nalunnguarluni, arpalluni sikkilerlunilu unammineq, aamma golferneq. Timersoqatigiit Kattuffianni pisortaq Carsten Olsen ilisimatitsivoq.
Aamma atuaruk Nunatsinneersut Island Games 2015-imut peqataanissaminnut piareersaleruttorput
Qeqertami Jersey-mi sila ukiut marluk matuma siornagut Bermudami unammisaqattaarnernit timersortartunut atoruminarnerussasoq Carsten Olsenip neriuutigaa.
- Sila nillataarnerusoq timersortartut misigisinnaassagaat neriuutigaarput, timersortartummi taamaalillutik angusarissaarnissaminnut periarfissarissaarnerussammata, Carsten Olsen oqarpoq.
Timersortartut amerlanersaat Jersey-imukarnissartik sioqqullugu Danmarkimi sungiusaqatigeereerput.
Arsaattartut Svendborgimi sungiusaqatigiillutillu sungiusaatigalugu unammisaqattaarput, sulorartartut Aarhusimi katerisimaarlutik sungiusarlutik nerrivimmilu arsaarartartut Tjelemi sungiusarlutik.
Unammiuaarnerit unammiffiusuni assigiinngitsuni pisussaapput . Timersortartut angusaat GIF-ip facebookimi quppernerani malinnaaffigineqarsinnaapput.