Nunatsinneersut Island Games 2015-imut peqataanissaminnut piareersaleruttorput
Kalaallit peqataasussarpassuit ilagaat arsaannermi angutit aamma arnat nunanut allanut unammisartut, taakkulu unammisaqattaarnissaminnut sungiusaleruttortut GBU-mi siulittaasup John Thorsenip oqaatigaa.
Nunatsinnili ukiuunerata sivisunerujussua unammillernartuusimavoq. Tamatumami kinguneranik silami sungiusarnissaq kingusissukkut aallartissimavoq, taamaattumillu sungiusarnerit annerusumik timersortarfissuarni timigissartarfinnilu pisinnaasimasut, John Thorsenip oqaatigaa.
Taamaattumik nunanut allanut unammisartut marluusut juunip 16-iannit 24-annut Danmarkimi sungiusartinneqassapput, tamatumalu kingorna Jersey-mi Island Gamesimi unammiuaarnernut peqataajartussallutik.
Isumalluartut
Angutit unammisartut gruppeqatigissavaat Spaniap qeqertarmiui Menorcameersut, Finlandip qeqertaani Ålandimeersut aamma Eslandip qertaani Saaremaa-meersut, arnalli unammisartut gruppeqatigissallugit qaaqqusisut Jersey-meersut aamma Norgemiut qeqertaanni Hitra-meersut.
Arsaannermi nunanut allanut unammisartut taakku marluk ujaminnanniunnernut anngussinnaanissaat GBU-p siulittaasuata ilimanarsinnaanerarpaa.
- Ingammik angutit, naak ukiuunera sivisugaluartoq ilungersuullugu sungiusarsimapput, teknikikkullu periarsinnaanerminni qaffasissumik inissisimallutik, John Thorsen oqarpoq.
Qeqertarmiut unammiuaarneri Island Games juunip 27-anni aallartikkunik sapaatip akunnerani ataatsimi unammisaqattaareerunik tallimanngornermi juulip pingajuanni naammassissapput.
