Isikkamik arsartartoq pakatseqqasoq: Allamik suliaqarallaannarsinnaavunga

- Soorunami isiginiarnartorujussuuvoq nunani allani unammisaqattaartorujussuupput, isiginnaartoqarnatik ingerlapput, nunatsinnilu coronaqarnani. Taanna paasiuminaappoq, soorunami unammisartutut, isikkamik arsartartoq, Per Fleischer oqarpoq.

Taasuma nunatsinni isikkamik arsaannermi qaammatip tulliani pissartanngorniuuttoqassannginnera uggoraa. Taamammi maannakkut isikkoqarpoq.

Naalakkersuisut coronap ajornartorsiortitsinerata nalaani nalunaarutaat nutaaq naapertorlugu nalunaaruteqarnikkut peqataaffigineqartariaqartussanut angalalluni, kommunimiit kommunimut allamut angalaqqusaanngilaq.

AAMMA ATUARUK Nivi Olsen pissartanngorniunnissap nalornissutigineqarnera pillugu: Arsaannermik aallartitseqqissaagut

Angutit Ilulissani pissartanngorniullutik aggustip ulluisa qulinganni aallartitussaagaluarput, arnallu Nuummi tamatuma kingorna sapaatit akunnerata qaangiunnerani aallartittumik pissartanngorniuttussaagaluarlutik.

Nunatsinnilu isikkamik arsaannermik pissartanngorniuuttoqarfissarisaraluanut qaammataajunnaartoq pissartanngorniuunnerit ingerlanneqarsinnaasut pillugu, Naalakkersuisut inaarutaasumik suli akissuteqannginnerat, Kalaallit Arsaattartut Kattuffiata kamaatigaa.

Demokraatinit, Nivi Olsenip Siumumiillu Erik Jensenip Naalakkersuisut ullumi aamma isornartorsiungaatsiarpaat.

Per Fleischerip oqaatigiuminaattoqarnera aamma qatsuppaa.

- Ilimagivara arlaqartut aamma piumassusikitsitsilissasoq taanna unitsinneqarmat. Soorlu uanga aamma imminut eqqaasinnaavunga, pingaartittuaannarpara sungiusartuaannarnissaq soorunami anguniagaqarluni pingaarami sungiusarluarsimanissaq, kisianni soorlu ulloqartarpugut, aah uatsi alla pingaarnerutillu taava, arsartartoq oqarpoq.

Nunatsinni pissartanngorniuunnerit arsartartut nunatsinni unammisartut sungiusaasuannut takutitsinissamut periarfissaalluaraluartoq, Per Fleischerip oqaatigaa.

AAMMA ATUARUK Erik pissartanngorniuunnissaq pillugu: Timersornermut aporfiusut – piaartumik – unitsinneqarlik

- Tassani aamma periarfissatsialaagami landstrænerimut takutitsinissaq. Imaanngilaq nunanut allanut unammisartunut kisimi.

- Assut pakatsinarami unitsinneqarnera, Per Fleischer oqarpoq.

KNR-ip Naalakkersuisut oqaaseqartinniarsarivai, taakkuli suli akissuteqanngillat.