Isertuussamik isumaqatigiissusiortoqarsimanngilaq

-Isertuussamik isumaqatigiissuteqanngilaq. Isumaqatigiissuteqarnera isumaqatigiissutigineqarsimanngippat isumaqatigiissuteqartoqarnavianngilaq. Pingaaruteqarmat annertuumik suliniarfigaarput, kisianni isumaqatigiissusiortoqarsimanngilaq, Kalaallit Nunaata aningaasaqarnera, aatitsitassat Danmarkimillu naalagaaffeqateqarneq pillugu ippassaq Folketingimi oqallittoqarmat ministeriuneq taama naqissusiivoq.

Jakob Ellemann Venstremeersoq apeqquteqaateqartuuvoq, taassumalu Kalaallit Nunaanni tusagassiuutini oqallinneq innersuussuutigaa. Isumaqatigiissusiortoqarsimaneranik oqallinneq Nunanut allanut ataatsimiititaliami sapaatit akunneri marluk matuma siorna isumasiuisoqarneranik aallaaveqarpoq. Tassani Nunanut allanut ministerip Danmarkip Kalaallit Nunaatalu akornanni isumaqatigiissusiortoqangajalersoq, peqatigisaanillu aatsitassat Naalagaaffeqatigiit sillimaniarnerannut pingaaruteqartut pillugit aalajangiisoqassatillugu Danmarkip tamatigut akuutinneqartarnissaanik naqissusiisoqarnissaa ilisimatitsissutigaa. Aleqa Hammondip kingorna Naalakkersuisut isumaqatigiissummik isumaqatigiinniutigineqareersimasunik isertuussinerarlugit isornartorsiorpai, Kuupikl Kleistilli danskit ministeriunerat assingalugu isumaqatigiissutip naammassillugu isumaqatigiinniutigineqarsimannginnera aamma naqissusersimavaa.

- Kalaallit Nunaanni maannakkorpiaq qinersisoqarpoq, tamannalu pissutigalugu suliat ingerlatagut maanna arriinnerusumik ingerlanneqalerput, tamannalu aamma isumaqatigiissutissamut atuuppoq. Suliniutit angisuut pillugit inatsimmut ilassutissatut inatsisissatut siunnersuummik saqqummiussisimannginnerput arlallit isornartorsiorpaat, qinersinerli naammassitinnagu Kalaallit Nunaannilu naalakkersuisut inissitsitersimatinnagit inatsisissatut siunnersuut saqqummiunniarnagu aalajangersimavugut, Helle Thorning oqarpoq.

Nunanut allanut ministeri Villy Søvndal Nunanut allanut ataatsimiititaliami sapaatit akunneri marluk matuma siorna isumasiuinermi paasissutissiissutigaa isumaqatigiissutissat ataatsimiinnerni marlunni isumaqatigiinniutigineqareersimasoq, marsimilu naammassineqarnissaa naatsorsuutigineqarsimagaluartoq. Kalaallit Nunaannili qinersisoqarnera pissutigalugu pilersaarut taanna kinguartinneqarsimavoq.