Isertortumik paasiniaasartut: Sorsunnersuaq Nillertoqarmalli Issittoq aatsaat taama aarlerinartoqartigaaq
Issittoq sakkuaaffiussanngilaq. Naalagaaffiit tallimat Issittumut killeqarfimmiittut taama oqariartuuteqarlutik Ilulissani isumaqatigiissummik taallugu 2008-mi atsioqatigiipput.
Taakkuli oqaatsit maanna soqutaarpasinngillat. Tassami Issittoq Sorsunnersuaq Nillertoqarmalli naalagaaffinnit arlalinnit aatsaat taama aarlerinartorsiortinneqartigisoq, illersornissaqarfiup isertortumik paasiniaasartui, tassa Forsvarets Efterretningstjeneste (FE), naliliipput.
FE ukiumoortumik nalunaarusiaminni taama allapput.
Rusland tassaaneruvoq Issittumut akeqqersimaartoq aarlerinartorsiortitsisorlu. Issittup sineriaani tamani sakkulersugaaqisunik sakkutooqarfiliornissaq, issittup imartaani sungiusarnerit aamma nunat tamalaat inatsisiliaannik unioqqutitsinerit uani eqqarsaatigineqarput.
- Ruslandip tamaarsinnaaneq imaani pisinnaatitaaffinnut FN-ip ataani isumaqatigiissummi pisinnaatitaaaffiusunit sakkortunerusumik killilersulereerpaa, imaassinnaavorlu Ruslandip Qalasersuaq tikivillugu oqartussaafigiumassagaa, FE nalunaarusiamini allappoq.
Ruslandip nunat allat Issitumiit qimagutitinniarlugit pissaaneqarniarluni sakkutuulersoriaannaasoq, isertortumik paasiniaasartut nalunaarusiaminni allapput.
- Taamaammat nunat killiit sakkutuui Ruslandip issitortaanut qanittumi iliuuseqarneranni Rusland akeqqersimaartumik akissasoq ilimanartorujussuuvoq. Nunani killerniit iliuutsit sungiusarnerusinnaapput aamma Issittup imartaani kikkulluunnit killilerneqanngitsumik angalasinnaanerat Rusland killiliisussaannginneranik takutsitsiniarluni ingerlaarnerusinnaallutik, FE allappoq.
Ruslandip Kina tapersersortigigaa
Ruslandili kisimi Issittumi pissaaneqarnerulerusunngilaq.
Ukrainemi sorsunneq pissutigalugu russit sakkutuui tamaviaarput, taamaattumillu Kinap Ruslandip issittortaani Issittumilu tamarmi akuujartuaalernissaa Ruslandip akuersaarpaa.
- Kinap Issittumi sunniuteqarnerunissi angorusuppaa nunarsuarmilu pissaanilissuunini takutikkusullugu. Kinap Issittumi angorusutani Ruslandimik suleqateqarnermigut angussavai, nalunaarusiami allaqqavoq.
Kina Issittumi ukiut qulit tulliuttut iluanni sakkutooqalerumaanissaminik ineriartortitserusuttoq, taamatuttaaq issittumi aningaasarsiorluarnissamik soqutigisaqartoq, illersornissaqarfiup isertortumik paasiniaasartui naliliipput. Imarsiorluni aqqutinut tunngasunik pinngortitallu pissarititaanik, pingaartumik uuliamik gassimillu qulakkeerinninnissaq tassani pineqarput.
Kinap issittumi peqataanera ilisimatusarnermut aamma malunniuteqassaaq. Kinammi Issittumi ilisimatusarnermini paasisani sakkutooqarfiliornissamut pilersaarusiornerani atorneqarsinnaapput, tassanilu nunarput pingaaruteqartoq, FE allappoq.
- Kinamiut ilisimatusarnermik suliaat aamma issittumi nunani assigiinngitsuni, aamma Kalaallit Nunaanni stationeqarnissaq, eqqarsaatigalugit Kina akuunissaminik qulakkeerinnikkusulluni ilisimatusarlunilu suliniutinik naammassinnissinnaajumalluni suli soqutiginnippoq.
